Imvunge ngeBlack Label beyigxeka
KUSUKELA abaxhasi nabagqugquzeli beCarling Black Label Champion Cup bememezele ngoMsombuluko ukuthi umdlalo oba khona minyaka yonke ngeke udlalwe kulo nyaka ngoba bevulela isitebele sabo esisha esixhase iNdebe yoMhlaba, ukuthi sikhangise ngokukhululeka, kunemvunge ngokubuya kwawo ngesizini ezayo.
Lo mdlalo osufana nesiko ngaphambi kokuqala kwesizini, odlalwa yiKaizer Chiefs ne-Orlando Pirates, ngeke ube khona kulokhu ngoba abaxhasi bawo banika isitebele sabo esisha ithuba elanele lokukhangisa ngeBudweiser, okuyiyona exhase iNdebe yoMhlaba ezoba ngenyanga ezayo eRussia.
Ngesikhathi lo mqhudelwano ufika eminyakeni eyisikhombisa eyedlule, abalandeli bebhola eNingizimu Afrika okuhlanganisa nabazo izinkunzi zaseSoweto, bakhalile ngawo ngoba bebebona ukuthi usuphakamisa la maqembu womabili kuphela. Imbangela yalokhu kuvungama kwabantu ngeCarling Black Label Cup bekudalwa ukuthi ingene esikhundleni seTelkom Charity Cup ebidlalelwa amaqembu amane bese kuthi yonke imali ebeyenziwa ngayo (iCharity Cup) ihlukaniswe izinhlangano ezisiza abangakwazi ukuzisiza bona. Nokho iPremier Soccer League (PSL) nabakwaBlack Label baqinise abathandi bebhola kuleli idolo ngokuthi nakuba izoshintsha indlela okucazwa ngayo imali kodwa abahlwempu basazohlomula.
Akukho osekuke kwezwakala ngokuhlabana kwabahlwempu ngenxa yeBlack Label Cup ngaphandle kokuqeqeshwa kwabaqeqeshi abasafufusa kodwa nakho okugcina kungabafikisanga ndawo.
Abathandi bebhola kuleli baveze iqiniso ngokuthi yini abayizwa ngaphakathi ngeBlack Label Cup kusukela kumenyezelwe ngoMsombuluko ukuthi ngeke ibe khona kulokhu. Ezinkundleni zokuxhumana abalandeli basayibhunga namanje le ndaba kodwa okucacayo wukuthi igcagcele esokeni kwabaningi, abanye bafisa ungaphinde ubuye. Babodwa abathi akubuye iCharity Cup eyaqedwa kungalindele muntu ngo-2010.
“Kungani kumiswa eyethu imidlalo ngendaba yeNdebe yoMhlaba esingadlali kuyona siyiNingizimu Afrika?” ubuze kanje u@Phazamisa AKA Ngozi The Return. U@BigMike_VersusEditorRound 3 uthe: “Kunganjani kuvele kubuye iCharity Spectacular?”
U@luckydinho uthe: “Ayivele iqedwe iBlack Label Cup ngoba iyacika futhi ayihlabahlosile.” U@ scoreman99 uthe: “Vele inkomishi kabhiya le. Ayivele idlalewe abadlali bakudala (legends).” Ayivele iyekwe indaba yayo kusho u@DopeZN.
“Ayingahlehli kepha iqedwe bese kubuyiswa iCharity Cup,” kusho u@Denelson11.
“Sijabule kakhulu ukuthi ibhuntshile eyalo nyaka. Sifuna kubuyiswe iCharity Cup. Kungumsebenzi weChiefs nePirates ukukwenza lokho,” usho kanje u@sikunikuthando.
Kwenzeka konke lokhu nje, uJacques Grobbelaar ophethe iFNB Stadium umemezele kwiTwitter wakhe ukuthi ngoJulayi 21 kuyona le nkundla iChiefs izodudulana neMamelodi Sundowns emqhudelwaneni omusha ozokwaziwa ngeleShell Helix Cup.