Useqalile ukuthungatha ikhaya elisha umdlali weMaritzburg United
USEQALILE ukuthungatha ikhaya elisha umdlali wasesiswini weMaritzburg United uSheldon van Wyk ohluleke wancama ukuyenza eyakhe indawo eqenjini likaFadlu Davids eligile izimanga ngesizini ka-2017/2018.
UVan Wyk, oyibamba ezinhlangothini, akazange ayiqale imidlalo eminingi kwiTeam of Choice kwazise isikhathi esiningi ubeyibuka nabalandeli. Isolezwe lihoshe ukuthi uzama inhlanhla kwiBidvest Wits ethungatha umdlali ozovala isikhala sikaVincent Pule obheke kwiKaizer Chiefs noma i-Orlando Pirates ngesizini ezayo.
IZitshudeni zizame nokuthola uPaseka Mako weChippa United kodwa yenqaba iChili Boys. Nakuba ingakapheli isizini kodwa kubukeka iTeam of Choice isivele ivumile ukuthi uVan Wyk aqale ukuzifunela iqembu azodlala kulona ngesizini ezayo kwazise inkontileka yakhe iyaphela ekupheleni kwesizini.
UVan Wyk usayine kwiTeam of Choice ngo-2014 esuka kwiDiphiri edlala kwiABC Motsepe League emuva kokuthatha iso lobengumqeqeshi uSteve “Mphathi” Komphela. Ungenile ngesikhathi iWits idlala owobungani neMamelodi Sundowns eGoli ngoLwesibili.
Umthombo weSolezwe ukuqinisekisile ukuthi uVan Wyk angase afudukele kwiWits ngesizini ezayo.
“UVan Wyk ulapha kwiWits njengoba ngikhuluma nawe. Ungenile enkundleni ukuze ahlolwe nguGavin (Hunt) njengoba kade kudlalwa owobungani neSundowns. Baningi abadlali abahlolwayo kwiWits kulezi zinsuku. Angazi ukuthi isimo sakhe simi kanjani kwiMaritzburg kodwa sinaye lapha,” kusho umthombo.
Nakuba uVan Wyk engumdlali osezingeni eliphezulu kodwa uthwale kanzima ukuhlwitha ijezi kuDeolin Mekoa noMxolisi Kunene abayibamba kwesokunxele kwiTeam of Choice. IMaritzburg izodlala owamanqamu weNedbank Cup okokuqala emlandweni wayo uma isidudulana neFree State Stars eKapa ngoMeyi 19. MgoMgqibelo izovala isizini ngowabakhaya baKwaZulu-Natal neLamontville Golden Arrows eHarry Gwala Stadium, eMgungundlovu, ngo-3 ntambama.