UBilankulu ufuna ukuyivusa i-Arrows
INSIKA yeLamontville Golden Arrows, uMusa Bilankulu, ifuna Abafana Bes’thende babuyise udumo lwabo lokuyenza isiko indaba yokungena kwiTop 8.
NgoMgqibelo ngo-3 ntambama i-Arrows izodudulana neMaritzburg United eHarry Gwala Stadium, eMgungundlovu, emdlalweni we-Absa Premiership.
Womabili amaqembu anezinhloso ezehlukene. I-Arrows ibheke ukuqinisa indawo yayo kwiTop 8 kanti iTeam of Choice igaqele ukuqeda endaweni yesithathu kwi-log ukuze iyodlala kwiCAF Confederation Cup ngesizini ezayo.
Abafana Bes’thende bahlezi endaweni yesikhombisa kwi-log ngamaphuzu awu-37 emidlalweni ewu-29 yeligi.
“Ngaphambi kokuthi sigawulwe yizembe besaziwa njengeqembu elihlale likhona kwiTop 8. Ukuphutha kwethu kwiTop 8 kuqale ngemuva kokuthi kade siyinqobile indebe yeTop 8. Sidlale amasizini amathathu singangeni kuyo sase sigawulwa yizembe. Sifuna ukubuyisa lo mgqigqo omdala wokungena kwiTop 8 kalula. Asifuni ukwaziwa njengeqembu eliqeda kunombolo 10 kuya phansi. Akuyona into enzima.
“Uma uqoqe amaphuzu awu-40 nakanjani uyangena kwiTop 8. Ngesizini edlule singenile kwiTop 8, nakulokhu sifuna ukungena. Sifuna kube yinto yamasizini wonke ukungena kwiTop 8.”
I-Arrows idinga amaphuzu amathathu ukuze izibekisele indawo kwiMTN 8 ngesizini ezayo.
“Konke kusezandleni zethu. Kumele sinqobe ngoMgqibelo ngoba uma sidlala ngokulingana sizongena enkingeni. Mancane kakhulu amathuba okuthi singangena kwiTop 8 uma sidlale ngokulingana ngoba kumele imiphumela emine ivune thina okuyinto okungelula ukuthi yenzeke,” kusho uBilankulu.
Emzuliswaneni wokuqala la maqembu adlale ngokulingana ngo 0-0 ePrincess Magogo Stadium, KwaMashu.
“Ngeke kube wumdlalo olula. Lona ngumdlalo wabakhaya, sidlala neqembu eliyingozi. Balambele amaphuzu ngendlela efanayo nathi. Kudingeka siqine ngokomqondo. Isimo esibhekene naso esithi asicishe sifane nesangesizini edlule kodwa sithe ukwehluka kancane. Sidlala neqembu elehlukile kulokhu futhi sisesikuhambeni.”
Ngesizini edlule i-Arrows ithele othulini i-Orlando Pirates ngo 2-1 eMoses Mabhida Stadium, eThekwini, emdlalweni wokugcina weligi. Ngemuva kwalokho izibekisele indawo kwiTop 8.