Kulindelwe 60 000 koweDowns neBarca
KULINDELEKE ukuthi kube nabalandeli abalinganiselwa ku-60 000 abazobuka umdlalo wobungani phakathi kompetha be-Absa Premiership, iMamelodi Sundowns, nabeSpanish La Liga, iFC Barcelona.
Umdlalo, ongowokugubha iminyaka ewu-100 kwazalwa owayengumengameli uNelson Mandela ongasekho, uzoba seFNB Stadium ngoLwesibili oluzayo ngo8.15 ebusuku.
UJacques Grobbelaar, isikhulu esiphezulu seStadium Management South Africa, ehlela umdlalo ngokubambisana neMotsepe Foundation, uthe iBarca izotheleka nezilomo zayo. Lokhu kuchaza ukuthi uzobe ekhona uLionel Messi (osesithombeni).
“Ngiyacabanga ukuthi abathandi bebhola bazophuma. Sibheke ukuthi sidayise amathikithi awu-60 000 kuya ku-65 000. Uma ethengwa wonke awu88 000 kuzobe kuwubufakazi bokuthi uNelson Mandela wayengumuntu omkhulu kangakanani,” kusho uGrobbelaar.
Uthe umdlalo, oklindelwe kuwo iziphathimandla eziwu-400 eziqhamuka emazweni ehlukene, abawuthathi kancane neze.
“Silindele nokuthi kufike nomengameli waseSpain, inxusa laseSpain ngisho nomengameli weFifa. Ukuqiniseka ukuthi ezokuphepha ziphezulu sizokhipha onogada abawu-1 400 abazoqapha isimo.”
Ephendula imibuzo evela kubalandeli ekhasini lakhe le-twitter izolo ngokudayiswa kwamathikithi, UGrobbelaar uthe abezoqala ukutholakala izolo ebusuku eComputicket/Shoprite. Abiza phakathi kuka-R40 kuya ku-R550.
Ngokusho kwakhe umdlalo wawuhlelelwe ukuthi ube ekupheleni kukaMeyi kodwa wagcina ubekelwe uMeyi 15.
“Kwatholakala ukuthi ngoMeyi 22 abadlali (beBarcelona) kuzomele bayojoyina izikwati zabo zamaqembu esizwe ukulungiselela iNdebe yoMhlaba. Nokusondezwa kwawo ube ngoMeyi 15, sicelwe yibona abaseSpain abathe ngoMeyi 16 kuneSpanish League Day okungafanele iphazamiseke. Iqembu lizofika lonke lidlale bese liphinda emuva ngabo lobu bosuku ngoba linomdlalo wokugcina weligi ngempelasonto,” kusho uGrobbelaar.
Ukuba khona komdlalo kuhlehlise umdlalo weSundowns weCAF Champions League obekumele iwudlale neHoroya yaseGuinea ngoMeyi 15. ICAF ivumile ukuwuhlehlisela uMeyi 22. I-Premier Soccer League nayo iwugunyazile umdlalo weBarca izeseka ngokuthi mkhulu kakhulu ngoba ungokaMandela. Phambilini iPSL yachitha umdlalo we-Ajax Cape Town neLiverpool izeseka ngokuthi wenzeke isizini ingakapheli. Nayo le ayikapheli. NgoMeyi 19 kunomdlalo wamanqamu weNedbank Cup.