U-Igesund uthwele uPitso ngeqoma
UMTHWELE ngeqoma umqeqeshi weMamelodi Sundowns uPitso “Jingles” Mosimane, owayecija Abafana Ba Style neBafana Bafana, uGordon Igesund.
U-Igesund ophethe izicoco ezine zePremier Soccer League (PSL) azinqoba namaqembu ehlukene akakuboni okuzoma endleleni kaMosimane ekutheni abalwe nezingwazi zabaqeqeshi eNingizimu Afrika.
U-Igesund ubambene ngezicoco ezine noTed Dumitru ongasekho emhlabeni noGavin Hunt ololonga iBidvest Wits. Laba baqeqeshi balandelwa nguMosimane ngezicoco ezintathu zeligi. UMosimane unqobe isicoco sakhe sesithathu seligi kule sizini neSundowns.
U-Igesund utuse amagalelo kaMosimane ngesikhathi exoxa naleli phephandaba.
“Ngifisa ukubongela uPitso, wenze umsebenzi omuhle. Ngiyazi ukuthi abantu abaningi bacabanga ukuthi kulula ukunqoba isicoco neqembu elikhulu. Nokho akunjalo. Lapha kumele ukwazi ukumelana namakhanda abadlali abahlukene. Wonke amehlo asuke ethe njo kuwena ukuthi wenze ezibukwayo. “Kunzima ukunqoba isicoco seligi uphindelela. Akuwona umsebenzi olula. Ngakho anginaso isizathu sokuthi ngingabaze ukuthi angasinqoba isicoco sesine. Kuyoba ngumlando kuyena ngoba uzobe eseshaya ngezicoco ezine. Vele amarekhodi ahlalele ukuthi ephulwe. Nokho kumele azi ukuthi nami ngisasibhekile isicoco sami sesihlanu seligi. Ikhefu lingisizile. Sengikulungele ukubuyela ekuqeqesheni esigabeni esikhulu,” kusho u-Igesund.
Le ngwazi yadla isicoco seligi neManning Rangers, Santos, Orlando Pirates neMamelodi Sundowns.
“ISundowns kumele ishayelwe ihlombe ngendlela esinqobe ngayo isicoco seligi. Bekungekho ukungabaza ukuthi izoba ngompetha. Ikwenze lokhu ibhekene nezimo ezinzima njengoba ibidlala nakwiCAF Champions League. Abebebhekene nakho ngikwazi kahle. Eqenjini elincane kulula ukunqoba isicoco seligi ngoba isuke ingekho ingcindezi. Noma ungaqeda endaweni yesibili noma eyesithathu wonke umuntu uzokushayela ihlombe aphinde akuncome ngomsebenzi omuhle.
“Eqenjini elikhulu ayingenwa indaba yokuqeda endaweni yesibili. Ngesikhathi ngisinqoba neRangers neSantos akekho owayesibhekile. Into engase ngilwa nayo wukwenza abadlali bakholwe wukuthi singawina. Noma kungathiwa asiwinanga sasingeke sikhale kakhulu ngoba vele sasingenayo ingcendezi yokuthi sibe ngompetha,” kusho u-Igesund.
NgoMgqibelo ngo-3 ntambama iSundowns izobhekana neBloemfontein Celtic emdlalweni wokugcina we-Absa Premiership eDr Molemela Stadium. Ngemuva komdlalo izonikwa ngokusemthethweni indebe yayo.
Imidlalo ye-Absa Premiership:
NgoMgqibelo ngo-3 ntambama: SuperSport United v Baroka (Lucas Moripe Stadium); Polokwane City v Chippa United (Old Peter Mokaba Stadium); Maritzburg United v Lamontville Golden Arrows (Harry Gwala Stadium); Platinum Stars v Bidvest Wits (Royal Bafokeng Stadium); Ajax Cape Town v Kaizer Chiefs (Cape Town Stadium); Orlando Pirates v Free State Stadium); Bloemfontein Celtic v Mamelodi Sundowns (Dr Molemela Stadium); AmaZulu v Cape Town City (King Zwelithini Stadium)