OweSharks utusa owamaBhokobhoko ngefomu
UMQEQESHI weCell C Sharks, uRobert du Preez, akawuvali umlomo ngendlela abadlali bakhe abebebizelwe ekhempini yamaBhokobhoko ebiseThekwini muva nje, ababuye nezimpawu zokuvuthwa ngayo ngesikhathi esikahle lapho iVodacom Supre Rugby isiqala icacisa abafana emadodeni.
NgoMgqibelo iSharks imelwe umqansa wokuzibuyisa zishisa izinduku kwiVodacom Bulls ebukise ngabo besekhaya emasontweni amathathu edlule. Okwenza lo mdlalo weSharks ube semqoka ukuthi uma iwunqoba bese eminye imiphumela ihambisana nalokhu abakufisayo, leli qembu laseThekwini lizobe likhona emidlalweni yokuhlunga.
Uma konke kuzoya ngokukaDu Preez nakanjani iSharks izowunqoba lo mdlalo ngoba lokhu uRassie Erasmus abenze khona abadlali bakhe abayisishiyagalombili abebabizele ekhempini, kwenze umehluko omkhulu.
“Angazi ukuthi ubenzeni uRassie kodwa laba ababizile babuye behluke kakhulu. Lokhu kwenzeke kahle ngesikhathi sigxilile ekukufakeni ezingqondweni zabadlali ubumqoka bokubeka iqembu phambili. Ngemuva kokunqoba kumaStormers (DHL) sithole ithuba lokukhumbula ukuthi kukhulu futhi kuningi kangakanani esingakwenza yinqobo nje uma sikukholwa lokho.
“Namanje angikakholwa ukuthi ithina laba abebedlala neHighlanders. Ngabe ngenza iphutha uma ngiziba igalelo likaRassie kulesi sikhathi esincane nje abebathathe sona.
“Sinqoba kwiHighlanders bonke abadlali abebesesikimini okuhlanganisa nebhentshi badlale lo okuthiwa unenkosi phakathi umbhoxo kodwa laba abebeke bathi ukuyosebenza noRassie bebehluke kakhulu kunathi sonke. Umdlalo bawenze waba ngabo. Bebengasabi ukwenza amaphutha. Kusemqoka ukuthi simbonge uRassie ngokusivusa ngesikhathi lapho umqhudelwano usungena khona kuvuthondaba,” kusho uDu Preez.
Abadlali abafana noMakazole Mapimpi, Tendai Mtawarira, Lukhanyo Am, Robert du Preez, Curwin Bosch noSbu Nkosi ngabanye balaba uDu Preez akhuluma ngabo. Bakhombise izimpawu zokukhulu emdlalweni weHighlanders ikakhulukazi uBeast noMapimpi abasefomini emangalisayo kulezi zinsuku.