Besebebuyela ngodli onesi abasuswa
BAVINJWE sebebuyela ngenkani esibhedlela eKing Edward VIII onesi abebesuswe khona ngenxa yezikhukhula ezalimaza isakhiwo, bafakwa esibhedlela eKing Dinuzulu eThekwini kusukela ngoDisemba.
Balinganiselwa ku-50, onesi okwavunyelwana ngokuthi bobuya sekulungiswe amawodi amabili alinyazwa yizikhukhula ngo-Okthoba.
NgoLwesine babuyele eKing Edward bephelezelwa abaholi benyunyana yabo iDemocratic Nursing Organisation of South Africa (Denosa). Kulamule umhlangano phakathi konesi, inyunyana nabaphathi besibhedlela abathembise ukusukumela izikhalo.
OnguNobhala weDenosa KwaZulu-Natal uMnuz Mandla Shabangu, uthe:
“Ngokwesivumelwano ukususwa kwabo eKing Edward kwakuzoba yizinyanga ezintathu kuphela kusalungiswa amawodi amabili ababesuswe kuwo. Simangele uma kuhamba isikhathi bengakhokhelwa (imali yokugibela) futhi ingakhulunywa eyokubuyiswa kwabo eKing Edward,” echaza.
UShabangu uthe bebecabanga ukuthi bayezwana uma bekhuluma nabaphathi baseKing Edward kodwa bangakwenzi abakuthembisile. Yize ethe bayakuqonda ukukhahlamezeka kwesibhedlela ngenxa yezikhukhula, kumele babacabangele nabasebenzi.
Ngeledlule uShabangu ubekhona emhlanganweni obuseKing Edward obekukhona kuwo nomphathi wesibhedlela uDkt Mandla Mazizi. Uthe abaphathi bathe bazoqala ukukhokhelwa ngoLwesine onesi, abanye bakhokhelwe ingakapheli inyanga.
“Sithe onesi ababuyele eKing Dinuzulu sibone ukuthi kulokhu isithembiso sizogcinwa yini. Uma bengakhokhelwa kuzomele baphindele eKing Edward ekupheleni kwenyanga ngoba yilapho ababeqashelwe ukusebenza khona kwasekuqaleni,” kusho uShabangu.
Okhulumela uMnyango wezeMpilo KwaZulu-Natal uNksz Ncumisa Mafunda, uthe bayazi ngalolu daba. Uthe abaphathi baseKing Edward babe nomhlangano nabasebenzi. “Umhlangano ube yimpumelelo. Umnyango unethemba lokuthi izingqinamba ezike zaba khona zizosombululeka ngokushesha,” kusho uNksz Mafunda.