I-Afrotainment yethule izinhlelo zayo zeDurban July
SEYILUQALILE uhambo olubheke kwiDurban July i-Afrotainment njengoba ngoMsombuluko ebusuku yethule izinhlelo zayo zalo mcimbi esithangamini nabezindaba eMoses Mabhida Stadium, eThekwini.
IDurban July yakulo nyaka izoba ngoJulayi 7, eGreyville Racecourse. Le nkampani ibiyethula ngokusemthethweni itende layo eliba khona eGreyville kanjalo nezinhlelo zomcimbi oba yi-after party, iFact Durban Rocks, ezoba sePeople’s Park, eMoses Mabhida Stadium ngosuku olufanayo. IFact yakulo nyaka kuzoba ngeka-15 kanti itende lona kuzoba ngokwesikhombisa likhona.
Umphathi we-Afrotainment, uDJ Tira, uthe iFact iyakhula futhi igqamisa iTheku.
“Nakulo nyaka sizoba neziteji ezimbili, esisodwa kuzoba yileso okuzosina kudedelane abaculi esinye kube ngesehouse okudlala kakhulu o-DJ. Kumele kuvele kuthiwe ngesegqom’ ngoba vele uzwa ngalo usaqhamuka kude. Igqom’ liyaphilisa futhi selidale umsebenzi kubantu abaningi njengeDistruction Boyz neRude Boyz,” kusho uTira.
Uthe abantu abangamfoneli bacele kuye amathikithi kunalokho kumele bayowathenga.
Amathikithi aseqalile ukudayisa eComputicket ngoR200 kuthi iVIP ibe nguR850. Kuvele ukuthi iVVIP ayidayisi.
Abaculi abazoshiyelana inkundla kubalwa kubo u-AKA, Kwesta, Sjava, Babes Wodumo, Tipcee, Mlindo the Vocalist, Dladla Mshunqisi, Amadada Dancers, Prince Kaybee, Shimza, DJ Bongz, Junior De Rocka, Touch of Soul, Infinite Boyz nabanye. Uhlelo luzobe luphethwe nguTshatha woKhozi FM, Smash Afrika nabalingisi boZalo uNocxy Mabika noKhaya Dladla.
Abanye abaculi bazonandisa etendeni leDurban July nakwiFact Durban Rocks.
Amathikith etende atholakala ngokuthumela i-email ku-tara@travel-pa. co.za.
Lo mcimbi uphinde wasebenza njengethuba lokukhombisa ngabaculi abasha uTira abasizayo okunguParas oshaye ingoma yakhe entsha ethi, Qondi nomrepha uGwaza athe wamthola eMlaza edayisa amaCD akhe ngoR20.