UDe Lille ubuyiselwe kwesokuba yiMeya
INKANTOLO eNkulu eWestern Cape isinqume ukuthi uNkk Patricia de Lille abuyiselwe esikhundleni sakhe sokuba yiMeya yaseCape Town nokuthi abe yiKhansela leDA emkhandlwini.
IJaji uPatrick Gamble uthathe lesi sinqumo ngoLwesithathu lapho ememezele khona ukuthi uDe Lille kumele abuyele esikhundleni sakhe kuze kube uMeyi 25 lapho kuzobe kubuyekezwa lesi sinqumo.
UGamble uphinde waveza ukuthi kuzomele aqondiswe ubugwegwe, alandele umyalelo weDA njengokomgomo weqembu.
UDe Lille uye eNkantolo ngoLwesihlanu ukuyophikisa isinqumo seDA sokumhoxisa njengelungu leqembu ngokomthetho weqembu, uSection 3.5.1.2 othi “uma ilungu le qembu likhuluma emphakathini liveza ukuthi lifisa ukushiya iqembu buyaphela ubulungu balo.” Kusetshenziswe lo mthetho ukuxosha uDe Lille kwi-DA. IDA ithathe isinqumo sokumkhomba indlela uDe Lille ngemuva kwenkulumo yakhe emsakazweni aveza kuyo ukuthi uzolishiya iqembu ngemuva kokuthi esephothule konke abhekene nakho njengamanje eqenjini.
Phakathi kwezinsolo abhekene nazo eqenjini, iDA ibale ukuhluleka ukuphatha izimali zomkhandlu ngendlela.
Ngemuva kwesinqumo senkantolo iDA ishicilele isitatimende yaveza ukuthi isazoqhubeka imizamo yayo yokuxosha uDe Lille.
“Ngeke sigudluke emizameni yethu yokubeka idolobha laseKapa kuqala ngokuqinisekise ukuthi ukungaphathwa kahle komkhandlu akusondeli ehhovisi leMeya. Isethembiso sethu ngo-2016 sasithi ngeke sivumele umkhonyovu eKapa futhi sizoqhubeka silethele abantu izidingo. Sinokuzethemba ngokuthi ukuxosha uDe Lille eqenjini kusazokwenzeka.”