Bazoqhubeka nokubhikishela uMahumapelo
AMALUNGU e-ANC eNorth West angahambisani noNdunankulu, uMnuz Supra Mahumapelo, athi azoqhubeka nomkhankaso wawo wokumkhipha esikhundleni.
Athe afuna kuhlakazwe ubuholi be-ANC eNorth West lapho uMahumapelo enguSihlalo khona.
La malungu azibiza ngeRevolutionary Council, athe awakusabi ukuqondiswa ubugwegwe inqobo nje uma uMahumapelo ehlile esikhundleni . UMnuz Thato Magogodi okhulumela iRevolutionary Council utshele i-Independent Media ukuthi bayasamukela isinqumo sikaMengameli Cyril Ramaphosa sokubeka uhulumeni waseNorth West ngaphansi kweso lomqaphi kodwa asanele ngoba uMahumapelo usaphethe izintambo.
“Siyasamukela isinqumo sikamengameli kodwa sizoqhubeka nomkhankaso wethu ngoba sifuna uMahumapelo aphume esikhundleni futhi kuhlakazwe nobuholi be-ANC eNorth West. Sizoqhubeka nokulwa, asifuni uMahumapelo amoshe ikusasa le-ANC,” kusho uMagogodi.
Uthe abantu abasayithembi i-ANC eNorth West ngoba isetshenziswa nguhulumeni kaMahumapelo ukudla imali.
“Sifuna buhlakazwe ubuholi besifundazwe kube nethimba elizobhekelela abantu baseNorth West elingacheme namuntu. Ngeke sisonge izandla sibuke uMahumapelo emosha i-ANC,” kusho uMagogodi.
UMnuz Zola Saphetha weNehawu uthe bazoba nokhukhulelangoqo wemashi eNorth West ngoba abasebenzi bezempilo bathwele kanzima kulesiya sifundazwe.
“Sifuna kube nesisombululo enkingeni yabasebenzi bezempilo nakuhulumeni waseNorth West. Sizomasha futhi, uhlu lwethu sizoludlulisela kuDkt Nkosazana Dlamini Zuma okuwuyena ohola ithimba longqongqoshe eliphenya okwenzeka kulesiya sifundazwe. Siyasebenzisana nethimba longqongqoshe ngoba sifuna impilo engcono kubantu nakubasbenzi,” kusho uSaphetha.