UMolefe uzokhuculula inkohlakalo eTransnet: Outa
I-ORGANISATION Undoing Tax Abuse (Outa) ithi uPopo Molefe, oqokelwe ukuba wuSihlalo weBhodi lakwaTransnet, uzokhuculula inkohlakalo kule nkampani kahulumeni.
UMnuz Rudie Reyneke, obhekelele ezokuthutha kwi-Outa, uthe uMolefe udume ngokulwa nenkohlakalo futhi akasabi ukulwa nezikhulu ezikhohlakele.
“Sihalalisela uNgqongqoshe wamaBhizinisi kaHulumeni, uMnuz Pravin Gordhan, okhombisa isibindi sokufuna ukulungisa isimo ezinkampanini zikahulumeni. Siyajabula ngokuqokwa kukaMolefe ngoba siyazi uzoyiqeda nya inkohlakalo eTransnet. Ibhodi ebelikhona belingenzi lutho yingakho sikujabulela ukufika kwelisha,” kusho uReyneke.
UMolefe utshele izintatheli ukuthi uzolwa nenkohlakalo futhi akayi kwaTransnet ngomqondo wokuthi kukhona okonakele khona kodwa uzojuba ithimba elizophenya ukuze abagangayo bajeziswe.
“Uma kukhona abantu abangasebenzi sizoqinisekisa ukuthi benza umsebenzi wabo. Abadla imali bazojeziswa ngoba asizile ukuzodlala,” kusho uMolefe.
Izolo uGordhan uqoke uMolefe njengoSihlalo weBhodi lakwaTransnet kanti phambilini uMolefe ubenguSihlalo weBhodi lakwaPrasa.
UGordhan uthe amalungu ebhodi lakudala lakwaTransnet, oMnuz Seth Radede, Potso Mathekga noZainul Nagdee azohlala ekhaya njengoba kufika uMolefe nethimba lakhe.
Abasethimbeni likaMolefe ngoMnuz Louis Zeuner, Ramasela Ganda, Nkk Ursula Fikelepi, Edward Kieswetter noNkk Dimakatso Matshoga.
Khonamanjalo uSihlalo weBhodi lakwaDenell, uNksz Monhla Hlahla, uthe uyayamukela incwadi yokwesula kwesikhulu esiphezulu senkampani uMnuz Zwelakhe Ntshepe.
UNtshepe, osule izolo emuva kokusebenzela iDenel iminyaka ewu-20, uthe ushiya ngenxa yezizathu ezingahlangene nomsebenzi.
UNksz Hlahla uthe uMnuz Michael Kgobe nguye ozobamba njengesikhulu esiphezulu.