‘Bhalisani ukukhangisa imikhiqizo yenu’
KUGQUGQUZELWA osomabhizinisi abafuna ukukhangisa imikhiqizo yabo ukuthi basheshe babhalisele ukuyikhangisa kwiDurban Regional Business Fair ezoba seHammarsdale Junction ngoMeyi 25–27.
Osomabhizinisi abahlala ezindaweni ezakhele iPinetown namaphethelo kufanele babhalise ngaphambi kuka Meyi 16.
Esitatimendeni esithunyelwe nguMasipala weTheku kuvezwe ukuthi umbukiso wezinsuku ezintathu uzoba nezinkundla zokucobelelana ngolwazi ezizosiza osomabhizinisi abasathuthuka zibaxhumanise nomakadebona kwezamabhizinisi.
Kuzoba nohlelo oluzocija osomabhizinisi olubizwa nge-2018 Lion’s Den Business Plan.
Kuzoba neConstruction Indaba nenkundla yokucobelelana ngolwazi yabanamabhizinisi ayimifelandawonye.
IMeya yeTheku, uNkk Zandile Gumede, igqugquzele osomabhizinisi ukuthi basebenzise ithuba ukuthuthukisa izinkampani zabo ngoba umbukiso ulethwa kubantu. “Kubalulekile ukuthi osomabhizinisi abancane beze embukisweni ngoba yibona abadala amathuba omsebenzi. Sifuna bakhangise imikhiqizo yabo bangaze balinde umbukiso omkhulu oba senkabeni yeTheku.”
Uthe njengoba begubha iminyaka ewu20 kwasungulwa iDurban Business Fair bafuna ukukhulisa umnotho lapho kuhlala khona abantu.
Ukubhalisela iRegional Business Fair kubiza u-R200 kanti amafomu atholakala ophikweni lwamabhizinisi, izimakethe, nezokuvakasha oluku-199 Anton Lembede (Smith) Street, eThekwini nasezikhungweni zikamasipala ezibizwa ngoSizakala Centres nasemahhovisi amakhansela.
Ayatholakala nakwiwebsite kaMasipala weTheku ethi www. durban.gov.za.
Eminye imininingwane itholakala ngokuthinta uNksz Fezile Nzuza ku031 311 4500 noma 031 322 9971 nange-email: Fezile.Nzuza@durban. gov.za