Kubhikishe izitshudeni zikhala ngeNSFAS
KUME nse ukufunda eCoastal KZN TVET College eSwinton Campus eThekwini izitshudeni zibhikisha zikhala ngesikhwama esixhasa izitshudeni, iNational Student Financial Aid Scheme (NSFAS) abathi asibanikile imali yokwenza izimfuno zesikole.
Izolo nangoMsombuluko akufundwanga kuleli kolishi ngenxa yezitshudeni zibhikishela ukungayitholi imali kwaNSFAS.
Omunye wezitshudeni, uLihle Zwane, ukhale ngokuthi abanazo izinsizakufunda njengoba lesi sikhwama singayikhiphile imali yezincwadi nemali yendawo yokuhlala abafundi. “Sesiside isikhathi silinde le mali kwaNSFAS. Sesibhale izivivinyo kodwa izincwadi asinazo njengoba ingakhishiwe imali yezincwadi, nemali yendawo yokuhlala izitshudeni. Akukho lula ukufunda ungenayo indawo yokuhlala nezincwadi ungenazo, ikakhulukazi uma sekusondele ukuhlolwa.”
ULihle ukhale ngokuthi lezi zinkinga ngeNSFAS zibaphazamisa kakhulu izifundweni zabo njengoba bengakwazi ukufunda kahle ngenxa yezitshudeni ezibhikishela ukushoda kwezinsiza kufunda.
Okhulumela lesi sikhungo, uNkk Snegugu Zuma uthe babe nomhlangano nabantu bakwaNSFAS bavumelana ngokuthi imali yezitshudeni izobe isingenile ngoMsombuluko (kuthangi).
“Imali yokufunda isikhokhiwe kepha imali engakangeni ile eyisibonelelo sezidingo zokufunda.”
Uthe imali ingangena noma yinini kusuka ngoMsombuluko.
UNkk Zuma uphinde wathi izitshudeni beziyifuna yonke imali yazo iyisamba esiphelele kepha bona abanayo imvume yokwenza lokhu, imali bazoyifaka kancane njalo ngenyanga.
UNkk Zuma ukuqinisekisile ukuthi izitshudeni zizosizakala njengoba abakwaNSFAS bezovakashela leli kolishi namhlanje bezokhuluma nazo.