Isexwayiso: ayidayisi imisebenzi kamasipala
UMASIPALA weTheku udonse ngendlebe abafesele imisebenzi ukuthi bangadlali amaqola abathembisa imisebenzi emkhandlwini bese ebakhokhisa oR3 000.
UMnuz Mandla Nsele obhekele ezokuXhumana kuMasipala weTheku usho lokhu emuva kokuvezwa kwemininingwane yendoda ebiqola abantu ibathembisa imisebenzi emkhandlwini weTheku nakwaTransnet uma beyinika uR3 000.
Abantu ababhale ezinkundleni zokuxhumana bathe le ndoda bebeyikhokhela bese ibaphathela izinkontileka kodwa uma sekufanele bayoqala emsebenzini inyamalale.
UNsele uthe imisebenzi yakwaMasipala ayidayiswa futhi abagwaziswayo kufanele babike emaphoyiseni ngoba lokhu kuyicala.
“Sicela abantu babikele amaphoyisa nophiko lweIntegrity and Investigation kuMasipala weTheku ukuze aphenywe lawo macala.
UNkk Dumisile Nene ophethe ezabasebenzi uthe abantu bangalokothi bakhokhele amaqola athi kuyagwazwa ukuze uthole umsebenzi kuMasipala.
“Wonke amathuba omsebenzi akhangiswa kwi-website, ephephandabeni likamasipala, Ezasegagasini nakwamanye amaphephandaba,” kusho uNsele.
Uthe abakhokhisayo ababikwe ku-0800 20 20 20 nasemaphoyiseni ku-10111.
AbakwaTransnet bagqugquzele abantu ukuthi bavule amacala uma kukhona abathi abakhokhe imali ukuze bathole umsebenzi kule nkampani.
Bathe imisebenzi ayikhokhelwa futhi uma kunezikhala zikhangiswa kwi-website yenkampani nasemaphephandabeni.
Inkampani i-Illovo Sugar South Africa nayo izwakalise ukukhathazeka ngabantu abawaka abanye KwaZulu-Natal naseGauteng babathembise umsebenzi kule nkampani.
Esitatimendeni abase-Illovo bathe imisebezi yakhona kayikhokhelwa futhi akekho umuntu ojutshwe yile nkampanii ukuthi aqashe abantu.
“Sicela amalungu omphakathi aqaphele amaqola afuna imali ukuze abafake emsebenzini.
“I-Illovo ayisoze yafuna imali kubantu efuna ukubaqasha. Sicela abafuna umsebenzi bangene kwi-website yethu ethi www.illovosugarafrica.com.
“Uma befuna ukwenza isiqiniseko sokuthi isikhala somsebenzi sikhona bangasithinta ku-abc@illovo. co.za.
“Sisebenzisana namaphoyisa ukuqinisekisa ukuthi abaqola umphakathi bayaboshwa,” kusho abase-Illovo.
Bathe umphakathi kufanele uyobika emaphoyiseni ukuze kuboshwe izigilamkhuba.