Inzima impilo kumaPalestina
MHLELI: Kuleli sonto kuzobe kuphela iminyaka engu-70 selokhu ama Palestina abalelwa ku-750 000 awumnsinsi wokuzimilela asuswa ngendluzula emhlabeni wawo ukuze kubunjwe ikwa-Israel. Kula maPalestina, lokhu kubizwa ngeNakba, isibhicongo esikhulu. Ngakolunye uhlangothi lokhu kuyiminyaka engu-70 selokhu i-Israel yazimela. U-Umm Omar wayeneminyaka eyisishiyagalombili ngenkathi izinswelaboya zakwa-Israel zimkhahlela nomndeni wakhe bedingiswa epulazini labo endaweni engamakhaya iJusayr ngoMeyi ka-1948 ekusungulweni kwe-Israel.
“Sasilime ukolweni. Ngikhumbula ngiphuma siya emasini nabazali bami ngiyintombazayana encane. Emuva kwalokhu asikaze siphinde sibe nozinzo,” kusho u-Umma osengubo ziye eweni. Kuthe uma udlame luya ngokudlanga lo mndeni wabe usuphoqwa ukuthi ufudukele eJalabiya, okuyinkambu yabantu bokufika esentshonalanga yeGaza Strip.
Uyise ka-Umm Omar wabuyela eJusayr ukuyobheka lapho okwakulima khona umndeni wakhe. Wathola ukuthi yonke into yanyinjengoba ayeyishiyile. Akabange esabuyela emndenini wakhe njengoba ashona elapho. Ukwalelwa ukubuyela emakhaya kwasho ukuthi izifiki eziyizinkulungwane ezinjengomndeni ka-Umm Omar ikhaya lazo lagcina kuyinkambu. Esikhathini sanamhlanje cishe abantu abangu-70% eGaza yizifiki. Okusho ngokusobala ukuthi baxoshwa ngendluzula ezindaweni esezibe ngaphansi kombuso wakwa-Israel. Abakaze laba bantu bakwazi ukubuyela emhlabeni wabo phezu kokuba inhlangano i-United Nations inesiphakamiso esithi kumele babuyele emakhaya abo.
Imizabalazo yokubuyela emhlabeni wamaPalestina isiqalile endaweni engaphansi kwengcindezelo eGaza Strip. Kulo mshikashika obizwa ngeGreat Return March (GRM), izinkulungwane zamaPalestina zinemibhikiso enokuthula emngceleni owucingo we-Israel neGaza kusukela ekupheleni kwenyanga edlule. Ezinye zezimfuno zababhikisi wukuthi kuqedwe unswinyo oselube khona iminyaka engu10. Unswinyo lukhinyabeza kakhulu umnotho nempilo yamaPalestina.
Selokhu kuqale imibhikisho sekushone amaPalestina ang-50. Bangaphezu kuka 5 000 abalimalile abadutshulwa nsuku zonke. Kwa-Israel abekho abantu okuye kubikwe ukuthi bashonile noma banemihuzuko
“AmaPalestina afuna ilungelo lawo lokuphila. Futhi ke lo mkhankaso uyaqina ngeGreat Return March. Ayikho into eGaza ongathi ijwayelekile. INakba akuyona nje into esemlandweni kodwa wumzabalazo esibhekene nawo usuku nosuku. Sikwamukele ukuthi vele ngelinye ilanga sizokufa. Lapha eGaza into ebuhlungu wukuthi kwakhona ukuphila ngokujwayelekile njengabanye abantu asikwazi,” kuchaza okhulumela iGRM u-Ahmad Abu Rtemah.
Into-ke edala ukuthi uhulumeni wakwa-Israel engavumi ukubuyisela amaPalestina emhlabeni wawo yingoba awawona amaJuda. Into emangazayo wukuthi amaJuda aseNingizimu Afrika angakaze ahlale kuleliya lizwe ayakwazi ukuthola ubuzwe ngaphansi komthetho omusha wakwa-Israel. UmPalestina yena ongowokuzalwa kuloya mhlaba, onenxiwa kuleya ndawo, mancane amathuba okuthi angathola ngisho imvume yokuvakasha nje! Sandile Dayi UDayi usihlalo weYoung Communist League KwaZulu-Natal