AbeSadtu bafuna kuphathe ababo
MHLELI: Ziningi izinkinga ezibhekene nabaphathi bezikole kuleli lengabadi.
Zibukeka zikhula njalo izinkinga phakathi kwezinyunyana zothisha, ikakhulu KwaZulu-Natal. Lokhu ngikusho ngoba sekukaningi kukhulunywa ngokunyuswa kwamaholo alabo abafundisa uGrade R kodwa kubonakala sengathi umnyango uyishaya indiva le ndaba.Namhlanje sivuka nezindaba zokuthi iPhini likaMengameli weNatu, uMnuz Allen Thompson, beselijahwa yimigulukudu ngezibhamu ngoba nje uhulumeni wakwaZulu-Natal akalifuni iqiniso.Kunokuba kuxoxwe uncamela ukusebenzisa isikhali ukususa loyo osuke eyinkinga kuyena.
Ngibuye ngize kwiSadtu. Othisha beSadtu mabayeke ukuthanda njalo nje ukuhamba imihlangano yokubonisana ngezikhathi zomsebenzi ngoba abafundi bayalimala ezifundweni. Nomnyango uphinde ubavune ekubeni beganga. Ngikhuluma nje kwesinye sezikole eSahlumbe Primary sekukhona umsindo olokhu uqhamuke njalo.
Abanye bothisha abekho ezingeni lokuphatha ngokweziqu zabo kodwa ngoba basohlangothini leSadtu bafuna kuphathe amaqabane abo ngoba babambisene ne-ANC. Lokho okugcina kwenza ukuthi izinto zingahambi kahle kwezemfundo ngoba nomnyango awukho phakathi nendawo kodwa uchemile. Isikhalo seSadtu uyashesha ukusizwa kodwa uphuze ukusiphendula kodwa eseNatu uyashesha ukusizwa bese usiziba unomphela. Lokho kugcina kuholele ekutheni kube khona abanyamanambana esikoleni uma ngabe bekhuluma iqiniso abeNatu.
Ngokwami ngithi umnyango wezemfundo kumele ukhiphe umsebenzi wozongamela isikole bese ziyachuthana kwinhlololwazi ingabikhona indaba yamaqabane. Ngiphinde nginxuse umnyango ukuthi uvule amehlo esikoleni iSahlumbe High njengoba kubonakala ukuthi uma kuvalwa izikole uthishanhloko, uzimisele yedwa ngokucija abafundi ezifundweni. Ngeke ngimangale ukuthi njengoba enza kanje yingoba eyiNatu ngoba imvamisa iNatu ithola othisha abakhuthele kodwa abanye babo bahleli emakhaya. Ngithanda ukuthi ngithi phephisa kuThompson, ngokumehlele.Kodwa ngithi iqiniso liyomkhulula umuntu bese kuthi amanga nenkohlakalo limenze isigqila sangunaphakade. Mnikelwa Thungo