Isikole sodumo siwusizo emphakathini
UKUNGAFUNDI kwezingane ezikhubazekile ezidinga ukunakekelwa okuthe xaxa ezindaweni ezisemakhaya, yinto ejwayelekile ngenxa yokuthi izikole ezizilungele azikho.
Ukuzama ukuvala lelo gebe emphakathini waseCarisbrooke, iCarisbrooke Inclusive Primary School, eXobho ifundisa abafundi abaphila ngendlela ejwayelekile nabafundi abaphila nokukhubazeka, abanezinkinga eziholela ekutheni badinge ukunakekelwa okuthe xaxa.
Kulesi sikole kufunda abafundi abakhubazekile emzimbeni okwenza bahambe kanzima noma bahambe ngezihlalo ezinamasondo, abangezwa, abanezinkinga ezenza ukuthi kube nzima ukufunda. Isikole siqala kuGradeR sigcine kuGrade7, siphethwe uMnuz Denn Shoba kusukela ngo-1996.
UShoba ufundisa i-Art. Ngaphandle kokufundisa izifundo ezijwayelekile sifundisa umculo, amakhono nokulima, ubuciko nokwenza ubuhlalu.
Sinabafundi abangaphansi kohlelo lwabafundi olwenziwa yiSoul City Institute for Health and Development Communication ngokubambisana neSABC Education noMnyango wezeMfundo eyiSisekelo kuleli, iSoul Buddyz Club.
Abafundi abangaphansi kwalolu hlelo bafundiswa ukuthatha izinqumo ezingeke zibafake ezinkingeni esikhathini esizayo, bafunda kabanzi nokubhekana nesandulela ngculazi, bakhuza izigameko zokuhlukumezana kwabafundi esikoleni, basiza ngamaphuzu okungaqhudelwana ngawo uma kunenkulumo mpikiswano noma okungaboniswana ngawo, babuye benze ucwaningo ngomphakathi abawakhele.
UNksz Sibongile Miya ofundisa uGrade 1 khona nguye ohola ithimba labafundi abaneminyaka ewu-10 kuya phezulu, abayingxenye yohlelo. Uthe njalo ngoLwesine amaSoul Buddyz ayahlangana acubungule isimo somphakathi aphila kuso. Kulo mhlangano yilapho kuvela khona ukuthi yini engenziwa ngamaSoul Buddyz nesikole sasendaweni ukulekelela imizi esuke ikhonjwe ukuthi idinga usizo.
“Phakathi kwezinto esike sisize ngazo umphakathi wukunikela ngemifino nezaqathe ezitshalwe lapha esikoleni. Kulo nyaka sihlele ukusiza umndeni owumakhelwane wesikole ngokuwucelela usizo lokuthi wakhelwe umuzi. Lo muzi wakhiwe ngodaka futhi uyadilika, akusebenzi muntu. Sicele izinkampani ezithile ukuthi zisilekelele ukuze sikwazi ukufeza iphupho lethu lokusiza abangenamandla, abakhe eduze kwesikole sethu. Maduze kuzoqala ukwakhiwa,”kusho uNksz Miya.
Uthe uyazifela ngomsebenzi wakhe ngoba umenza afunde kangcono ngezinkinga ezikhona emphakathini ezinomthelela ekufundeni kwezingane. “Ikilasi lami liyashesha ukuphuma. Uma seliphumile ngiba nesikhathi esanele sokuhlela umsebenzi wami namaSoul Buddyz. Sisebenzisa ubuchwepheshe besimanje bamaselula ukuze sixhumane namanye amaSoul Buddyz Club akwezinye izifundazwe,”kuchaza uNksz Miya. UShoba uthe isikole sinabafundi abangu-202 sakhiwa ngo-1911. Ngaleso sikhathi sasakhelwe ukufunda izingane zabantu abakhonza eWeseli.
Ngo-1948 indawo yaseCarisbrooke yangena emlandweni ngesikhathi umbhali wencwadi iCry, the Beloved Country, uMnuz Alan Paton ebhala ngale ndawo kule ncwadi.
Kunesahluko abhale ngosizi lomfundisi Stephen Kumalo webandla lamaWeseli owaya eGoli eyobheka indodana yakhe u-Absalom nodadewabo uGetrude. Wafica udadewabo esephenduke umqwayizi, indodana yakhe iboshelwe ukubulala indodana yomlimi omhlophe, uJames Jarvis, ekugcineni le mindeni iyaxolelana.
Le ncwadi ibhalwe ngezilimi ezingaphezulu kuka-20, idayisa emhlabeni wonke. “Azipheli izinyanga ezintathu singazange sibe nezivakashi eziphuma phesheya ezifuna ukuzibonela mathupha izindawo okukhulunywa ngazo kule ncwadi,” kusho uShoba.
Ezinye zezivakashi uthe ziye zinikele ngokuthile okuzothuthukisa isikole. Isikole sinenjini edonsa amanzi phansi, ngenxa yosizo lomunye wezivakashi.
Phakathi kwabantu abadumile abafunde khona kubalwa iPhini leNhloko yamaJaji kuleli, uMnuz uRaymond Zondo ohola ithimba eliphenya ngezinsolo zokudliwa kwamandla ombuso kuleli, uNkk Thembeka Mchunu owayeyimeya yoMkhandlu uThungulu, osuwaziwa ngeKing Cetshwayo.
UNkk Mchunu uwunkosikazi kaMnuz Senzo Mchunu owayewuNdunankulu waKwaZuluNatal. Ngesikhathi umyeni wakhe esewundunankulu esifundazweni wasebenzisa ihhovisi lakhe iSpousal Office, ukuze lesi sikole sakhelwe amagumbi amane azosisiza ukuze siqhube kahle umsebenzi waso.
Kulawa magumbi kukhona izindlu ezizosetshenziswa ngothisha nabeluleki uma kunabafundi okudingeka ukuthi kuxoxwe nabo esithe. Ngesikhathi Isolezwe likulesi sikole lifice uNkk Mchunu eyobheka ukuthi amagumbi akhiwe ngendlela eyiyo yini ngaphambi kokuthi inkontileka ebiyakha ihambe.
“Ngikholelwa ukuthi umuntu akumele akhohlwe izimpande zakhe futhi ngiyakholwa ukuthi izinsiza kumele zifakwe kakhulu ezikoleni zamabanga aphansi ngoba kulapho kuqala khona ikusasa lomfundi,” kusho uNkk Mchunu.
UShoba uthe abafundi bakulesi sikole badla kabili ekubeni kwezinye kudliwa kanye.
“Kunabafundi abasuka emakhaya antulayo. Kuyenzeka kungabi khona ukudla emakubo. Badla lapha esikoleni ekuseni baphinde badle sekuzophuma isikole. KunoMsamariya olungileyo osinikelela ngempuphu eyanele ukuthi abafundi badle kabili. Uma kushoda isishebo kuphekwa imifino nezaqathe ezitshalwe egcekeni,” kusho yena.