Usashaqwe eyesoka ‘ebelidlwengula’ ingane yakhe eno-11
USASHAQEKILE owesifazane waKwaMaviyo, eManguzi okuboshwe isoka lakhe ngezinsolo zokuthi lidlwengule indodakazi yakhe eneminyaka engu-11.
Lo wesifazane ongeke adalulwe ukuvikela umgilwa uthe ubelethemba isoka lakhe elineminyaka engu-50 elisolwa ngaleli cala.
Unina kamgilwa uthe umsowa walanda izingane zakhe ezimbili kadadewabo ngesikhathi yena esesibhedlela ngoba ethi uyasaba ukulala yedwa endlini.
“Lo baba ufike ngingekho ngisesibhedlela wacela abantwana kudadewethu ekhala ngokuthi uyasaba ukulala yedwa, ngokunganaki udadewethu, wamnika abantwana, wayolala nabo,” kuchaza unina kamgilwa.
Uthe wabuya ngoMsombuluko esibhedlela izingane zisesikoleni, wathola ikhondomu sebenzile ngaphansi kombhede wakhe. “Lawa makhondomu ayebuye nami emtholampilo, ngakho bengazi ukuthi awakaze asebenze. Ngibuze abantwana ngoba ngifuna ukubona ukuthi mhlawumbe abadlalanga yini ngawo, benza amabhelunde, base bethi abakaze badlale ngawo.”
Uthi wanaka nokuthi ingane ibiphethe uR100 esikoleni.
“Uma ngiyibuza ingane ukuthi iyithathephi le mali, yathi iyithathe ‘kumkhulu’ (umsolwa) . Kube sekungethusa lokhu ngoba ngisho nami ayikaze ingiphe imali le ndoda. Ngase nginaka nokuthi ingane sengathi ibuthakathaka emzimbeni.’’
Uthe uyibuzile ingane ukuthi umkhulu ubeyinikelani le mali, yathi uthe angatsheli muntu indaba yemali ngoba uma ike yatshela abantu, ufana nofile kanti nayo ifana nofile, wayisabisa ngommese.
Uthe wayihlola ingane wathola ukungcola okungaqondakali ephentini.
Kuyilapho achaze khona umntwana ukuthi umsolwa umcindezele ngedolo esifubeni wase emdlwengula.
Umama womntwana uthi ubezinika uthando oluningi umsolwa izingane zakhe, yingakho ebengasoli lutho ngoba ubezitshela ukuthi uyazithanda njengoba kuyizingane zomuntu athandana naye kanti uzitika ngocansi nale ngane. Umsolwa kulindeleke abuyele enkantolo ukuyofuna ibheyili kusasa.