Isigaba sokukhula sesihlasela nabano-30
CISHE akekho owesifazane ofisa ukuficwa yisigaba sokukhula esibizwa ngeMenopause, esifika nobunzima nokushintsha kwempilo. Yize lesi sigaba sifica noma ngubani, bekwaziwa ukuthi siqala kwasebeqala ukuguga. Kulesi sigaba owesifazane usuke esephelelwe inzalo nokuya esikhathini, kuphele nomdlandla wocansi.
Okuthusayo ukuthi lesi sigaba sesifikela ngisho abesifazane abasebasha.
UDkt Saleef Moola osebenzela eVerulam, uthe ayisekho eyokuthi ngabadala kuphela abangena kulesi sigaba. Uthe ngokujwayelekile bekwaziwa ukuthi lesi sigaba siqala kwabesifazane abaneminyaka engu-48 kuya phezulu kodwa akusenjalo.
“Sekuyenzeka owesifazane angene kulesi sigaba eneminyaka eko30. Nakhona kuya ngemizimba yabantu ngoba bakhona abangena sebebadala. IMenopause ibuye ihambe nangofuzo emndenini. Uma umama esheshe wangena kulesi sigaba, kuyenzeka nendodakazi yakhe ifuze yena,” echaza.
UDkt Moola uthe zikhona izimpawu zokuqala kweMenopause kodwa kudingeka umuntu aqinisekise kudokotela, kuhlolwe izinga lamaHomornes emzimbeni. Owesifazane ocele ligodlwe igama lakhe, uthe unomngani owangena kulesi sigaba eneminyaka engu-21 ongakaze athole ngisho izingane. Uthe kwadingeka ahlolwe kwaqinisekiswa kodokotela ukuthi usephethwe iMenopause. Kusolwa ukuthi ukudla okudliwa esikhathini samanje kunomthelela ekushintsheni kwemizimba yabesifazane. Ngokombiko oshicilelwe kwi-website yeHealthline kuvela ukuthi ukuthi ukudla kahle nokuzivocavoca kungaba nomthelela omuhle ekunqandeni ukushesha kweMenopause.
Ngokusho koodokotela iMenopause ayinqandeki kodwa ikhona imishanguzo esiza ukwenza ukuthi ukugula okuhambelana nayo kungabi mandla. Okwenzeka uma umuntu esekulesi sigaba kubalwa ukungayi esikhathini, ukoma kwesitho sangasese nokungalulangazeleli ucansi. Nazi izimpawu zeMenopause: *Ukujuluka kakhulu ebusuku nomzwangedwa
*Ukuqwasha nokhwantalala olungapheli
*Ukuba nenhliziyo encane nenzululwane
*Ukuqothuka kwezinwele nobuhlungu bamalungu omzimba
*Ukukhuluphala nokushwabana kwamabele
*Ukukhathala nokushintshashintsha kwezinsuku zokuya esikhathini.