OWE-PIRATES USEJOYINE I-CHIPPA UNITED

BUPHINDE bahlala obala ubudlelwano obukhona phakathi kwe-Orlando Pirates neChippa United ngesikhathi izolo iChilli Boys iveza ukuthi usengowayo uGift Motupa. Bekusalindelwe ukuthi uMotupa uzobuyela kwiBucs ngesizini ezayo ngemuva kokuba nesizini enhle kwiBaroka FC abebolekiswe kuyona. Kodwa izolo usihlalo weChilli Boys, uSiviwe “Chippa” Mpengesi, ukuqede konke ukuqagela ngekusasa lalo mgadli ememezela ukuthi usezogijima kwezakhe. “Ukhombisile ukuthi usezingeni eliphezulu kangakanani eshaya amagoli ayisishiyagalolunye kwiBaroka FC . Asingabazi ukuthi uzobe evutha phambi kwamapali ngesizini ezayo,” kusho uMpengesi ocashunwe ekhasini le-twitter leqembu kwi-@ChippaUnitedFC izolo ntambama.

Kuthiwe uMotupa usayine inkontileka yeminyaka emithathu. Iqembu liveza indaba kaMotupa nje, ngoMsombuluko liveze ukuthi usenikeziwe inkontileka entsha umqeqeshi uVladislav Heric. Nokho abuvelanga ubude bayo.

UHeric ubethathe izintambo ngasekupheleni kwesizini ngemuva kokuthi kukhonjwe indlela uTebogo Moloi, obesehlale izinyanga engenayo inkontileka, kulokhu kuthiwa iyeza.

UPotshoza usengakukhumbuza ukuthi uMotupa akasiye umdlali wokuqala ukusuka kwiBucs alibhekise kwiChippa. UThabo Rakhale ushudwe kulona leli qembu ngoJanuwari ngemuva kokungayitholi indawo esikimini ngaphansi kukaMilutin Sredojevic.

UBrighton Mhlongo, ohlulwe wukuyenza eyakhe indawo kanozinti kweZimnyama, naye uthuthelwe kuleli qembu elizinze e-Eastern Cape. Kuthe kusenjalo, uMpengesi wadayisela iPirates, uDiamond Thopola noPhetso Maphanga.

Yize uPotshoza enibikela ngalolu daba kodwa ngeke amangale uma engavuka kusasa iPirates isisho okunye ngoMotupa. Phela yona akukho okusemthethweni ekukhiphile. Phamabilini kuke kwasuka inkombankombane uMpengesi ememezela abadlali iBucs ingakasho lutho.