Ukhala ngegqubu labalandeli beStars
“Eqinisweni le nto isaqhubeka nokusilimaza. Banciphile abalandeli enkundleni, basacasukile ngokwenzeka. Ngebhadi besingakwazi ukubatshela ngakho konke obekwenzeka eqenjini. Akufihliwe ukuthi ukuma kahle kweqembu kuncike ekwenzeni kahle kwamabhizinisi omndeni,” kusho uMokoena.
“Manje izinto sezingcono, abalandeli sebeyazama ukubuya emuva kokufika komqeqeshi uLuc Eymael nabadlali abasebancane. Ngicabanga ukuthi impumelelo yeqembu izokwenza idlule emiqondweni yabo indaba yokudayisa. Iqembu alidayisi futhi angazi ukuthi kungani yadunyiswa kanjena le nto ngoba akukho okuphathekayo okwase kukhona. Manje awukho ngisho umcabango wokudayisa iqembu.”
I-Ea Lla Koto isethubeni lokuqeda ishobolo leminyaka ingawini indebe. Ngaphezu kwalokho iStars isethubeni lokuthola indawo kwiCAF Confederation Cup. Leli qembu alikaze liwine indebe kusukela kwasungulwa iPremier Soccer League (PSL). IStars izobhekana neMaritzburg United kowamanqamu weNedbank Cup ngoMgqibelo eKapa. UMasipala waseBethlehem noMnyango weZemidlalo bakhiphe amabhasi angu-15 azohambisa abalandeli eKapa.
“Lo mdlalo wamanqamu ubaluleke kakhulu, ikakhulukazi emndenini weStars. Sivike izembe kunzima ngesizini edlule. Ukuwina iNedbank kuzosiza nangemali. Kungaba yinto enkulu ukuyiletha ekhaya indebe, ikakhulukazi kubadlali abafana noPaulus (Masehe) ongokaputeni osekuseduze aphanyeke amakhokho emgibeni. Kufanele ayeke ibhola kukhona akuphethe,” kusho uMokoena.
“Ngicabanga ukuthi isinqumo ngenkundla okuzodlalwa kuyona owamanqamu sashesha sathathwa. Kukude kuwona womabili amaqembu futhi ngisho ungahlanganisa abalandeli bamaqembu womabili nabamanye ayisihlanu okungeyona iChiefs nePirates, ngeke siyigcwalise inkundla. Abalandeli bethu kufanele bahambe amakhilomitha angaphezu kwenkulungwane beya eKapa. Siyethemba ukuthi inkundla izobukeka.”