Kubhekwe isinqumo senkantolo
I-AJAX Cape Town ifuna ihlehliswe imidlalo yokuhlungela i-Absa Premiership okumele iqale namuhla ngemuva kokuthi izolo kuphume isinqumo esiyikhomba ehlathini ngodaba lukaTendai Ndoro.
Umehluleli weSafa, uWilliam Mokhari, ukhiphe isinqumo esilahla i-Ajax ngecala lokudlalisa uNdoro ekubeni usayine namaqembu amathathu ngesizini eyodwa okuyinto ephikwa imithetho yeFifa. Le mithetho igcizelela ukuthi umdlali angasayina namaqembu amathathu ngesizini eyodwa kodwa akumele adlalele angaphezulu kwamabili, okuyinto eyenzeke kuNdoro.
Ekuqaleni kwesizini uNdoro udlale kwi-Orlando Pirates, wayishiya wajoyina i-Al Faisaly yaseSaudi Arabia. NgoJanuwari ubuyele kwiAjax lapho okuqale khona izinkinga.
Isinqumo sikaMokhari sishove i-Urban Warriors ehlathini, kwiNational First Division (NFD) ephucwe amaphuzu ayisishiyagalolunye. Iqembu lihlawuliswe uR350 000, uNdoro kwathiwa uzomiswa imidlalo emibili. Nezindleko zecala zibekwe kwi-Ajax.
Amaqembu anikezwe amaphuzu, yiPlatinum Stars, SuperSport United nePolokwane City okuyiwona afaka izikhalo ngokudlaliswa kukaNdoro. I-Pirates yasifaka kodwa yabuye yasihoxisa.
I-Ajax igcine iqede emsileni ngamaphuzu angu-21, iStars yakhuphukela endaweni ka-15 ngamaphuzu angu-27. Lokhu kusho ukuthi iDikwena yiyona osekumele ivule imidlalo yokuhlunga neBlack Leopards.
Umdlalo kumele ube namuhla eThohoyandou ngo-3 ntambama njengoba, i-Ajax izolo iveze ukuthi ifuna uhlehliswe.
“I-Ajax ixhumana nethimba layo labameli ngesinqumo sikaWilliam Mokhari. Iqembu limatasa lilungisa amaphepha elizowafaka eNkantolo eNkulu yaseGoli ukuze udaba lulalelwe kusasa (namuhla) ngo-10 ekuseni. Phakathi kwezinto ezifunwa yiqembu ukuthi imiswe imidlalo yokuhlunga eqala ngoLwesithathu (namuhla) ngoMeyi 16 ngo-3 ntambamba. Lokhu sizokwenza ngokuphuthuma sibe sisacubungula isinqumo sikamehluleli,” kusho isitatimende se-Ajax ekhasini layo leTwitter izolo ntambama.
Isikhulu esiphezulu esibambile kwiPremier Soccer League (PSL), uMato Madlala, sithe kuyilungelo le-Ajax ukudlulisela udaba phambili.
“Thina siyiPSL akekho umuntu esilwa naye. Uma i-Ajax ibona kuyindlela efanele ukuthi iludlulisele phambili lolu daba ngeke size siyiphikise. Sizolalela isinqumo senkantolo bese silandela imigudu efanele. Okwamanje asifuni ukuqagela. Sizolinda kuze kube khona okubhalwe phansi okufika kithina,” kusho uMadlala.
Isinqumo sikaMokhari sikhiphe AmaZulu FC kwiTop 8. Lokhu kungenxa yokuthi iSuperSport United ngelinye lamaqembu afaka isikhalo ngokudlaliswa kukaNdoro.
Ukuvunwa isinqumo sayizolo kuyinikeze amaphuzu amathathu, yakhuphukela endaweni yesikhombisa kwi-log ngamaphuzu angu-39, AmaZulu ashoveleka endaweni yesishiyagalolunye.
Okhulumela Usuthu, uBrilliant Mkhathini, uthe: “Isinqumo sisesisha. Sizosithumela kubameli bethu basicubungule ngoba yonke le nto eyenzekayo sonke siyayiqala.
Isinqumo esizosithatha sizoncika kulokhu abazoseluleka ngakho.”
NgokwePSL imidlalo yokuhlunga kumele isongwe ngoJuni 2, elinye iqembu elikuyona iJomo Cosmos.
I-Leopards ithe ilungele noma yini ngoba vele kuyiwe emidlalweni yangempelasonto ingazi ukuthi izodlala nobani. IDikwena nayo ikubeke kwacaca ukuthi akuyethusi okushiwo yi-Urban Warriors ehlela ukufaka lolu daba enkantolo.