Imisakazo ayingabandlululi uma iqasha
MHLELLI: Kuyaye kujabulise ukubona izinhlanga ezahlukene zihlangene ndawonye ngazwi linye. Akukhathalekile ukuthi zisuke zihlangene ngani, kuphela nje uma kuyinto enhle.
Ngike ngabuka imisakazo eminingi ukuthi emsakazweni othile kugcwele luphi uhlanga. Ukhozi FM neGagasi FM kugcwele amaZulu. Okuyinto enhle nokho leyo ngoba ikhombisa ubumbano phakathi kwamaZulu. Okuyiyona engishisa ibunzi ngeyokuthi akukho noyedwa owomdabu waseNdiya, ikhaladi noma iBhunu emisakazweni yendlu ensundu. Nabo uma ubheka bagcwele eziteshini “zabo” lapho ongeke umthole umuntu welinye ibala.
I-East Coast Radio iyazama ukuhlanganisa zonke izinhlanga. Abantu abagcwele khona amakhaladi namaNdiya. I-5FM iqukethe kakhulu amaNdiya, amakhaladi namaBhunu. Bese uzobuka iLesedi FM, uMhlobo Wenene, Thobela FM, Ligwalagwala FM, RSG, Lotus FM neminye eminingi inabasakazi bohlanga abalusakazelayo. Phela nokucwasana ngeke kuphele uma imisakazo isazoqasha umSuthu emsakazweni olalelwa ngabeSuthu.
Akesibone abadidiyeli bezinye izinhlanga bedidiyela izinhlelo zoKhozi, zeGagasi, zeRSG, zeLotus njll. Akesizwe abaxubi bezingoma bezinye izinhlanga eziteshini zabezinye izinhlanga. Lokhu kuzokwenza ukuthi lolo hlanga lufunde ulimi lolunye uhlanga. Kuyaxaka ukuthi imisakazo efana neMetro FM kugcwele ibala elinsundu kodwa bebesakaza ngoLimi lwesiNgisi. Lokhu kungadala ukubumbana okuqinile phakathi kwezinhlanga ezahlukene. Ngiyacabanga nezinga lokucwasana lingehla.
Lokhu kungabalula futhi uma isiteshi sifuna ukuyokwenza umcimbi ohlangeni oluthile. Nabakhangisi abangakaze bakhangise kuleso siteshi bangaqala basibheke ngelinye iso. Nanokuthola nje abalaleli bolunye uhlanga kungaba yinto enhle ngenxa yokuthi sekuxutshwe izinhlanga. Imisakazo efana neRSG ngeke sisayithatha njengemisakazo elalelwa ngamaBhunu kuphela. Lapha ngikhuluma ngeLesedi FM engathi yakhelwe abeSuthu kuphela.
Abaphathi kumele beze nento ehlukile futhi ezobenza bazuze baphinde bahlomule kakhulu ngabaleli abasha. Angibonge. Themba Dlamini