Ufuna intsha ingasali emdlalweni weshashalazi ongeSilo uCetshwayo
UMSUNGULI womdlalo weshashalazi okhuluma ngomlando weSilo uCetshwayo, uJerry Pooe, uthe kubalulekile ukuthi abantu abasha bahlale bekhunjuzwa ngomlando wezwe.
“Abantu abaningi abayazi indima eyakhathulwa ngamakhosi ekutheni leli lizwe lithole inkululeko. Sicabanga ukuthi wosopolitiki kuphela ababamba iqhaza,” kusho uPooe.
Uqhube wathi: “ISilo uCetshwayo saba neqhaza elikhulu futhi yisona kuphela esakwazi ukunqoba amaNgisi. Abantu abasha kumele bakwazi lokho.”
Lo mdlalo, okulingisa kuwo abalingisi abangu-40, iKing Cetshwayo the Musical, uzokhonjiswa ePlayhouse, eThekwini, ngoJuni 20 uphele ngomhla ka-23. Umqondisi womculo nguMbuso Khoza.
Omunye wabalingisi okhona nguNhlakanipho Maphumulo odlala indawo kaMnyamana. UMaphumulo udlala indawo kaNduna kuZalo.
Njengoba uza kuleli nje, ngonyaka odlule ukhonjiswe okokuqala eWales ngesikhathi kugujwa iminyaka engu-135 iSilo uCetshwayo sasise-United Kingdom.
UPooe uthe banezinhlelo zokuthi umdlalo uhambele nezinye izindawo.
“Sizama ukuthi siwuyise kwezinye izindawo njengasoLundi, eMgungundlovu nalapho sizomenywa khona. Kumanje ngisePitoli nakhona siyafuna ukuwuletha,” kusho uPooe izolo emini.
Uthe njengoba bebheke ukuthi kube ngabantu abasha ababuka kakhulu umdlalo, abaneminyaka engu-18 bazothola isaphulelo emathikithini, bazodayiselwa ngoR30. Abadala linguR50, litholakala ePlayhouse naseComputicket. Umdlalo uqala ngo-7 ebusuku.