Sizotholakala maduze isixazululo samaholo: Dlodlo
UNGQONGQOSHE weziSebenzi zikaHulumeni nokuPhatha, uNksz Ayanda Dlodlo, uthembise ukuthi sizotholakala maduzane isixazululo odabeni lokunyuswa komholo wabasebenzi.
Uthe uhulumeni usebenza ngamandla ukuthi kufinyelelwe esivumelwaneni seminyaka emithathu nezinyunyana.
Uhulumeni uphakamise ukuthi anyuswe amaholo ngo-6 kuya ku-7%.
“Sibeke etafuleni isiphakamiso sokunyusa imali yokuxhasa izindlu namaholo. Nginethemba lokuthi maduzane sizofinyelela esivumelwaneni nazo zonke izinhlaka,” kusho uNksz Dlodlo ethula isabelo sezimali esingaphezu kukaR950 million ePhalamende eKapa.
Uthe zikhona izinhlelo zokunqanda ukunyuka kwesabelo esikhokhelwa abasebenzi njengokuthi kubhekwe eyamalivu, eyamabhonasi, ukubheka indaba yokuthi abasebenzi bangasebenzi isikhathi esengeziwe nezinye.
Uthe uma sekusayinwe isivumelwano izinhlelo zizofakwa ezintweni izinhloko zeminyango ezizozenza.
Okhulumela iCosatu uthe uhulumeni ucele ukuthi izingxoxo zihlehliselwe izolo ukuze kubhungwe ngesiphakamiso sezisebenzi.
IPSA yona ixhumana namalungu ayo ukuze anqume ukuthi afuna ukuteleka noma cha emuva kokuhlehla kwezingxoxo kuleli sonto.
Ifuna kunyuswe umholo ngo-10% kuwona wonke umuntu. Sekuphele inyanga yesibili abasebenzi bengawutholi uchatha.
Uchatha kwakumele bawuthole ngenyanga edlule kodwa kuze kube manje lutho.
UNksz Dlodlo uthe basebenzisana nePublic Service Commission (PSC), ukunqanda izehlakalo zenkohlakalo.
“Ukusabela ekhweleni likaMengameli sakha imigomo ukuze senze uphenyo sibheke indlela abaphila ngayo abasebenzi bakahulumeni. Sengeza emigomeni evele ikhona ethinta ukuthi abasebenzi akumele benze imisebenzi nohulumeni.”
Uthe labo okutholakala ukuthi benza imisebenzi nohulumeni babikwa emnyangweni wakhe ukuze bathathelwe izinyathelo.”