AmaSulumane aqinise ukuphepha

Isolezwe - - IZINDABA - ZANELE MTHETHWA

KUQINISWE ukuphepha kusukela ngoLwesithathu ebusuku emasontweni amaSulumane njengoba kuqala umkhosi iRamadan emuva kokuhlaselwa kwesonto e-Ottawa, eThekwini.

Lokhu kuvezwe nguMnuz Azad Seedat, uSihlalo nomsunguli wesonto i-Iman Hussain Ottawa, eVerulam, elahlaselwa ngoLwesine olwedlule kwashona oyedwa. Ukusho lokhu esithangamini nabezindaba ebesihlelwe ngabaholi bezenkolo abehlukene eThekwini. Uthe njengoba kuqala inyanga yabo yokuthandaza bafuna ukuqinisekisa ukuthi baphephile, kungaphindeki okwaseVerulam.

“Sicele amaphoyisa abonakale kuzo zonke izindawo zethu zokukhonza njengoba kuqale iRamadan. Sizoqhubeka nokuqinisa ezokuphepha ngoba namanje asazi ukuthi ngobani abahlasele eVerulam. Sihlela nokuthi kube namakhamera ezindaweni zokuthandaza ukuqinisa ukuphepha.”

USeedat owaya esontweni emuva kokuhlaselwa, uthe namanje basathukile. Uthe kukhona ikhamera abayisebenzisa ukuqopha izinkonzo zabo esontweni elihlaselwe eVerulam kodwa sekunesikhathi eside ingasebenzi. Ubonge ukwesekwa ngabaholi bezinye izinkolo, wagcizelela nokuthi bazothandaza ukuthi kungaphinde kwenzeke.

UBishop Bheki Ngcobo, omele iNational Interfaith Council of SA, uthe bazohlela imashi yokuthula ezoya eVerulam lapho kuhlaselwe khona amakholwa. Uthe bafuna ukunqanda umkhuba wokungabekezelelani kwabezenkolo, walinganisa ngokubulawa kwabasePalestine okusanda kwenzeka.

UBishop Nqoba Zindela, uSihlalo weMoral Regenaration Movement eThekwini, uthe ufisa amaphoyisa asheshe ababambe abahlaseli. Uthe zonke izinkolo kumele zibumbane zilwe nokubulawa kwabantu egameni lezenkolo.

Ukuhlaselwa kwesonto lamaSulumane kuqubule ukwesaba kwabale nkolo. Kulokhu kugwazwe uMnuz Farrouk Essop, wanqunywa intambo wafa. Kulimale noMnuz Mohammed Ali waphuthunyiswa esibhedlela. Ngesonto kuphinde kwatholakala ibhomu esontweni. Kuvele ukuthi u-Ali, osinde kuhlaselwa, usephumile esibhedlela wacashiswa ngenxa yokusatshiswa. Kuthiwa nguyena owavulela abahlaseli abebethe bafuna ukuzothandaza.

Okhulumela oKlebe, uCaptain Simphiwe Mhlongo, uthe kusaphenywa icala lokubulala, elokuzama ukubulala nelokucekela phansi impahla.

THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.

Isithombe:DOCTOR NGCOBO/ANA

UGCIZELELE ukuqinisa ezokuphepha emasontweni amaSulumane, uMnuz Azad Seedat, umsunguli wesonto lamaSulumane eVerulam, elihlaselwe ngesonto eledlule. Ubephakathi kwabaholi bezenkolo ababize isithangami nabezindaba, okubalwa kubo uMfundisi Ziningi Jali (kwesokudla)

Newspapers in Zulu

Newspapers from South Africa

© PressReader. All rights reserved.