Ososeshini bamatekisi banikele ngemifaniswano
BASHUMAYELE ivangeli loxolo nobunye ososeshini bamatekisi abangaphansi kwesifunda iLembe ngesikhathi benikelela abafundi abantulayo ngemifaniswano yesikole KwaDukuza Town Hall ngoLwesibili.
Bangu-322 abafundi abaqhamuka ezikoleni ezahlukene abahlomule ngemifaniswano nemali yokudla esikoleni abayithole ngemuva kokuphendula imibuzo ebebebuzwa yona mayelana nezinkulumo ezethulwe kulo mcimbi.
USihlalo kasoseshini iLembe, uMnuz Bongani Mkhwanazi ophinde abe nguMgcinimafa enhlanganweni yosomatekisi, iSouth African National Council (Santaco) KwaZulu-Natal uthe bayajabula ukubona izinhlangano zososeshini zibambisene uma zenza izinto ngoba lokho kugqugquzela ukuzwana.
“Izinhlangano zosomatekisi ezahlukene zivamise ukungaboni ngasolinye kodwa kuyasithokozisa ukubona ososeshini abangaphansi kwesifunda sethu bebambisene,” kusho uMkhwanazi.
Uthe nakuba kade kukhona ososeshini abangaphansi kwabo abebengesiyo ingxenye yomcimbi kodwa bayathemba ukuthi ngokuzayo bazoba khona.
UMkhwanazi uthe inhloso yokusiza abafundi ngemifaniswano ukubuyisela emuva emphakathini owenza ibhizinisi labo lichume.
Uthe kuningi abalekelela ngakho emphakathini uma beceliwe ngaphandle kokukhipha imifaniswano.
UMkhwanazi uthe bayabonga ngoba isifunda sabo sesinokuthula ngemuva kokuduma kabi ngodlame.
Isifunda seLembe sike sakhungathwa izimpi zososeshini abahlukene ezidlule nenqwaba yemiphefumulo eminyakeni edlule.
Lezi zimpi zigcine seziphazamisa nomnotho nezokuvakasha kulesi sifunda.