Bafuna okazwelonke uthathe imfundo eKZN
I-EFF KwaZulu-Natal ifuna uNdunankulu wesifundazwe uMnuz Willies Mchunu ukuthi angenele eMnyangweni wezeMfundo ngoba uNgqongqoshe walo mnyango uhlulekile ukuchaza ukuthi uzozixazulula kanjani izinkinga ethula isabelo sezimali salo mnyango muva nje.
UMnuz Vukani Ndlovu we-EFF, uthe kuyacaca ukuthi uMnuz Mathandeni Dlungwane akazi ukuthi uzozixazulula kanjani izinkinga.
Uthe imashi yeNatu neSadtu yacacisa ukuthi ikhwelo lalezi zinyunyana lishaya emhloleni uma zithi zifuna kungenele uNgqongqoshe kazwelonke uNkk Angie Motshekga.
Uthe othisha bakwaGrade R kabakhokhelwe wathi nesabelo sezemfundo sikubeke kwacaca ukuthi izinkinga ngeke ziphele.
UMchunu uthe wahlangana nazo zonke izinyunyana kwezemfundo okubalwa noDlungwane.
“Ngangenelela kwezemfundo ngahlangana nezinhlaka ezehlukene. UNgqongqoshe ukhulumile ngalo mhlangano nokuthi kuzokwenziwa uphenyo.
“Ngiyacela kumalungu ale ndlu ukuthi ahloniphe uhlelo lophenyo,” kusho uMchunu.
Uthe akungabhekwa kuphela oNgqongqoshe kodwa kubhekwe izikhulu ezisuke ziqashiwe.
“Uma kukhona abantu abengeneme, banalo ilungelo lokuthi bafake isimangalo, kubhekwe indaba yabo.
“Izinyunyana ezingafuni ukukhuluma nathi, ezifuna ukukhuluma noNgqongqoshe kazwelonke zinelungelo lokwenza lokho,” kusho uMchunu.
Usho lokhu nje ngoLwesibili uDlungwane uhlangane noNkk Motshekga obeseThekwini obezobheka isimo njengoba iNatu yamnxusa ukuthi angenele ezinkingeni ezibhekene nesifundazwe.
Le nyunyana ifuna uNkk Motshekga afake umnyango wesifundazwe ngaphansi komlawuli kazwelonke asebenzise isigaba somthetho u-100 isigatshana u-A no-B koMthethosisekelo.
Lokhu kusho ukuthi yonke into ethinta umnyango izokwenziwa wumnyango kazwelonke uma uNkk Motshekga egcina ewufaka ngaphansi kokulawulwa wuzwelonke.
Into ebikhalisa kakhulu izinyunyana ukungaholelwa kothisha bakwaGrade R ngenyanga edlule okuthiwa sebegcine beholile.
Okunye wukungavalwa kwezikhala, ukumiswa kwezinye izikhulu osekuthathe isikhathi eside, nohlelo lokuthengwa kwamaqakelo oludle uR109 million.
Phambilini uhlelo lwamaqakelo lwabelwa uR60 million kodwa lwagcina lunyukile ngoba “kunesidingo” ngokusho komnyango.