UMinnie nempilo yaseRussia ngeNdebe yoMhlaba
UMETHULI wezinhlelo uMinnie Dlamini uzothatha abeke ababukeli beSupersport ngosikompilo lwaseRussia ngesikhathi seNdebe yoMhlaba yeFifa ezoqala ngenyanga ezayo.
Isikhulu sakwaSuportsport uGideon Khobane sithe iNdebe yoMhlaba ezoqala ngoJuni 14 ayikho mayelana nebhola kuphela.
“Sinohlelo olukhombisa ngosikompilo lwaseRussia ukuthi abantu badlani nokuthi izwe linjani. Uma iNdebe yoMhlaba iya ezweni isuke iyoveza izwe,” kusho uGideon.
UGideon, obekhuluma ohlelweni iThursday Night Live with Marawa, uthe uMinnie uzohlala amasonto ayisikhombisa eRussia.
Ngaphandle kukaMinnie, baningi osaziwayo abazobonakala kwiSupersport bezinhlelo zakuMzansi Magic nakwi-1Magic.
Uthe ziningi izinhlelo zokuthi indlela abasakaza ngayo imidlalo ibe seqophelweni eliphezulu. Udalule nabahlaziyi abazobonakala ngesikhathi semidlalo.
“ERussia sizoba noRion Ferdinand, Phil Neville lapha eNingizimu Afrika sibe noYaya Toure, Jay -ay Okocha, Gianfranco Zola. Sibophele ithimba elihle,” kuchaza uGideon.
Ubale noPitso Mosimane, Gavin Hunt noShaun Bartlett nabanye.
Uthi ababukeli bazobona ukuthi abaqeqeshi yimaphi amaqhinga abazowasebenzisa emidlalweni futhi ngaphambi komdlalo kuzoba nemizuzu engu-90 yokuhlaziya.
Uthe abantu ngeke basale ngaphandle ngoba bazobamema ukuthi beze estudiyo sabo esisha abasakhayo esiseqophelweni eliphezulu.
Uthe ngemuva kweNdebe yoMhlaba bazobe sebesebenzela iPSL, i-rugby ne-cricket.
Uthe abaneDSTV Compact bazoyibona yonke imidlalo engu-64 bukhoma.