U-Eymael ongancengile ufuna baphumele obala
UWANQUMELWE ugwayi katiki amaqembu amgaqele umqeqeshi weFree State Stars uLuc Eymael.
Lo mqeqeshi odabuka eBelgium ufike kwezwakala eNingizimu Afrika. Ufike ezocija iPolokwane City ayifake kwiTop 8 kade kubhekwe ukuthi igawulwe yizembe.
Ngemuva kwalokho usindise iBloemfontein Celtic ezembeni. KwiStars ufike ekuqaleni kwesizini. Leli qembu lixoshe uSammy Throughton laqasha u-Eymael. Lo mqeqeshi wenze ezibukwayo ngesizini yakhe yokuqala.
Ufake iqembu kwiCAF Confederation Cup, ngokudla isicoco seNedbank Cup wase eqeda kwiTop 8.
Ekhuluma nabezindaba ngemuva kokushaya iTeam of Choice ngo 1-0 wegoli likaGoodman “Deco” Dlamini, u-Eymael ukubeke kwacaca ukuthi amaqembu amfunayo kumele acacise kuleli sonto.
“Uma iChiefs ifika ngemuva kwaleli sonto ngeke ngiye kuyona kodwa ngizobuyela kwiFree State Stars. Usuku nosuku iChiefs imataniswa nomqeqeshi omusha. Uma kungekho oqhamukayo kuleli sonto ngizobuyela kwiFree State Stars. Isikhulu seqembu uRantsie Mokoena naso siyazi. Kuleli sonto ngiya ekhaya eBelgium. Uma kukhona okumele kwenzeke kumele kwenzeke kulona. Ngeke ngifone, ngithumele umqhafazo noma ngibhale incwadi njengabanye abaqeqeshi. Ngeneme kwiFree State. Iqembu lizonginyusela iholo ngesizini ezayo, “kusho u-Eymael.
Amakhosi athungatha umqeqeshi emuva kokuhlukana noSteve Komphela ophikwe yimiphumela iminyaka emithathu ilandelana. U-Aymael ubenqoba isicoco sakhe sokuqala eMzansi.
“Lesi yisicoco sesihlanu eminyakeni eyisishiyagalolunye ngingumqeqeshi ezwenikazi i-Afrika. Senginqobe izicoco namaqembu ahlukene. Iningi lala maqembu akuwona amaqembu amakhulu. Le nto yokunqoba izicoco ihambisana nokulambela impumelelo. Uma ungabafaki ugqozi abadlali ngeke bakuwinele izicoco,” kusho u-Eymael.
IStars ihlababe ngoR7 million emuva kokuphakamisa isicoco seNedbank Cup.
“Ngifisa ukubonga lonke ithimba lami labaqeqeshi nezikhulu zeqembu ngokuseseka. Abadlali ngibatshelile ukuthi asingajabuleli ukuba semdlalweni wamanqamu kodwa kumele sijabulele ukuthi sinqobe umdlalo wamanqamu. Sikwazile ukumelana nengcindezi yeMaritzburg ngasekupheleni komdlalo. Abantu bayohlale bekhumbula ompetha. Ngeneme ngokuthi ngemuva kweminyaka engu-24 sikwazile ukufaka indebe ekhabetheni lethu lezinkomishi, “kusho u-Eymael.
Lo mqeqeshi ulincomile iqhinga lakhe adle ngalo iTeam of Choice. “Besazi ukuthi bazoliphatha ibhola kodwa noma bebengaliphatha amahora amathathu uma bengasigqobhozanga besinethuba lokuwina umdlalo. Sikwazile ukuvala izikhala phakathi nenkundla futhi besivimba kahle uma bephethe ibhola. Siyabazi abasilona iqembu elishaya amagoli ngamabhola asuke egotshiwe. Besihlele ukuthi basebenzise izinhlangothi bese begoba amabhola ngoba siyabazi ukuthi abayona ingozi kuleyo ngxenye yokudlala.”
Khona manjalo uMax Tshabalala ongumnikazi weBloemfontein Celtic utshele iSunday Times ukuthi iqembu liyadayisa ngoba unenkinga yemali. ICeltic ike yangabaholela abadlali ngesizini edlule baze bateleka ukuyojima.