UFransman uyashiya kwiMaritzburg United
IYASHIYA insika yomdlali wasemuva weMaritzburg United uBevan Fransman njengoba sekusongwe isizini.
Lezi zindaba zidalulwe usihlalo uFarook Kadodia ngesikhathi exoxa naleli phephandaba. UFransman nguyena obengukaputeni weqembu ngesizini esanda kuphela. Le nsika yomdlali ifike kuleli qembu ngo2016 kanti iqokiwe emiklomelweni yePremier Soccer League (PSL) emunxeni weDefende of the Season. Inkontileka kaFransman iphela ekupheleni kukaJuni.
“Yebo, uBevan uyahamba, inkontileka yakhe iphelile. I-agent yakhe isidumazile, ibilokhu imdayisa. Vele amaagent ayawuthanda lo mkhuba. Besithanda ukumgcina eqenjini kodwa izimo bezingaphezu kwamandla ethu. Yingakho sihlukane naye,” kusho uKadodia.
Nangesizini edlule iTeam of Choice yahlukana nokaputeni wayo uKurt Lentjies.
“U-Andrea Fileccia besinombandela wokwelula inkontileka yakhe. Lokho sesikwenzile. Une-agent entsha manje. Sizohlala naye sibone ukuthi ngeke sikwazi yini ukwenza enye inkontileka,” kusho uKadodia.
UFileccia uphenduke iqhawe le-United ngomzuliswano wesibili eshayela leli qembu amagoli amqoka.
“Sesisayinise uDenwin Farmer obekwiSuperSport United. Kunomunye umdlali futhi oseqophelweni eliphezulu olapha kwiSuperSport esikhuluma naye. Sibheke ukusayinisa okungenani abadlali abane. Iqembu lethu akulona elinabadlali abaningi,” kusho uKadodia.
I-United igile izimanga kule sizini. Iqede endaweni yesine kwilog ngemuva kwalokho yafinyelela kowamanqamu weNedbank Cup lapho ishaywe khona yiFree State Stars ngoMgqibelo eKapa.
“Abadlali esibabhekile ngabane abanamava. Sifuna bakhulise abadlali bethu abancane. Esikuzuzile kule sizini sibheke ukukuzuza nangesizini ezayo,” kusho uKadodia.
NgoMsombuluko iPSL ikhiphe uhla lwabadlali abaqokelwe ukwenza kahle kule sizini esanda kusongwa. Lolu hla belugcwele abadlali beTeam of Choice okubalwa kubona uSiyanda Xulu, Siphesihle Ndlovu, Lebohang Maboe, Fransman nomqeqeshi uFadlu Davids.
“Abantu baseMaritzburg sibenze baziqhenya ngathi. Ngeneme ngabadlali abaqokelwe imiklomelo yePSL. Iqembu belizinikela ngokuphindiwe isizini iqala yaze yayophela. Ukuqokelwa kwabo kule miklomelo kuyakhombisa ukuthi bebesebenza kanzima. Bavune izithelo zokuzinikela,” kusho uKadodia.