Uvume eyokushaywa wuMampintsha uBabes
UMCULI wegqom’ uBabes Wodumo uzizwa ethulwe umthwalo abewuthwele emahlombe akhe ngokukhuluma ngokuhlukunyezwa wumculi we-kwaito obebuye abe ngumphathi wakhe uMampintsha.
Lokhu kuvezwe nguyise omdala kaBabes, uKnowledge Simelane othe uBabes ubatshele ukuthi kuyiqiniso konke okushiwo ngumsakazi weMetro FM uMasechaba Ndlovu.
Esitatimendeni esikhishwe wumndeni ekuseni ugxeke indlela uMasechaba alusingathe ngayo lolu daba kodwa ntambama wabuye washintsha.
“Sesihlanganile nontombazane ngoba ekuqaleni ubeseGoli. Usebuyile, usekhaya. Uthe konke obekushiwo kuyiqiniso futhi empeleni wethuleke umthwalo,” kusho uSimelane.
Uthe abakanqumi ukuthi kukhona yini icala abazolivula noma cha. Imizamo yokuxhumana noBabes ayiphumelelanga izolo.
NgoLwesihlanu uMasechaba unekele izwe ukuthi unomngani owathatha uBabes ngemuva kokuxhimfwa wuMampintsha ebusweni ngesibhakela waphuma igazi ngamakhala. Uthe futhi wamshaya waze waphuka emlenzeni. Ngaphambi kokuveza lezi zindaba ezashaqisa abaningi, uMasechaba uzwakala ethi ubeshilo ukuthi ngeke akwenze lokhu ngaphambi kokugeqa amagula. Uze atshele uBabes futhi akadingi nokuthi aphendule.
Kusukela kwenzeke lokhu abantu bahlukene phakathi abanye beseka uBabes abanye bekhala ngendlela uMasechaba aluveze ngayo udaba. Uyise kaBabes uMbhishobhi Welcome Simelane esitatimendeni uthe ushaqeke kakhulu ngokuzwa ukuthi uMampintsha ubehlukumeza indodakazi yakhe.
“Sifisa izwe lazi ukuthi siwumndeni asihambisani nazo zonke izinhlobo zokuhlunyezwa kwabesifazane nokuthi besingenalwazi nobudlelwano bezothando abebenabo ngaphandle komsebenzi obubahlanganisile,” kusho uSimelane.
Uthe akusiyo inqubo yabo ukuthi bazigaxe ezindabeni zangasese zezingane nasemsebenzini eziwenzayo kodwa lolu daba lubaphoqile ukuthi bakhulume. Bathe bayabonga kuMampintsha ngokuvundulula uBabes futhi ambeke ezingeni akulo namuhla futhi banethemba lokuthi uzokwamukela ukukhula kwakhe njengoba esenkampani ethi yena iWena Wodumo Entertainment. Ekhuluma emsakazweni uBabes wathi akasathandani noMampintsha ayesethembisene umshado naye.
UMampintsha yena uthe ubengakaze amtshele uBabes.