UNandi Madida nezibukwayo kolwengqephu azobe eluphethe

INTOKAZI yaseThekwini esizakhela igama emculweni nasekuhambeleni amazwe omhlaba yethula izinhlelo, uNandi Madida (osesithombeni) ithembise into yamehlo ohlelweni lwayo oluzokhulisa intsha efuna ukungena kwezemfashini, iMade Africa.

Uhlelo luzoqala ngoLwesithathu, Meyi 30, kwiBET (DStv 129), ngo-9, ebusuku.

UNandi echaza uthe uhlelo luqoshwa eThekwini, inhloso yalo wukuqhakambisa ithalente ezwenikazi, i-Afrika.

“Kuzobonakala ukuzikhandla nezinyembezi kubona bonke abalungenele. Konke lokhu kuzobe kwenzeka ngoba oyedwa kulaba ufuna ukuhlaba umxhwele amajaji futhi azakhele igama endimeni yemfashini ngemisiko,” kusho uNandi.

Uthe uhlelo luzoveza imfashini futhi abantu bayibuke ngenye indlela.

“Oyowina ohlelweni uyothola ithuba eliyingqayizivele njengoba izingubo ezenziwe nguye ziyotholakala ezitolo ezehlukene zakuleli,” kuchaza uNandi.

UMonde Twala wakwaBET, uthe bajabule ngokuba nohlelo oluzohlanganisa intsha yasezweni i-Afrika, izokhombisa ngamathalente.

“Sibonga abaxhasi balolu hlelo, uMnyango wezokuThuthukiswa koMnotho neKZN Film Commission,” In kuchaza uTwala.

Uthe esiqeshini sokuqala kuzobonakala uNoloyisa Lubelwana noTowa Mungandi, beqophisana ekwenzeni umsiko ozodonsa amehlo amajaji.

Kulolu hlelo kuzobonakala osaziwayo okukhona kubo uVanessa Leisegang, Zama Mathe, Francois Vademme, Adama Amanda Ndiaye waseSenegal, Natasha Tlagae waseBotswana, Tiffany Prior, Ndabo Langa, Sthandiwe Kgoroge noSbahle Mpisane benza izinto ezehlukene kulona.