Konakele esibhedlela Osindisweni
IKHATHELE ukuthethiswa yiziguli nezihlobo zazo, ezicabanga ukuthi sidonsa izinyawo ngomsebenzi kanti nathi sibhekene nenkinga yokuthi asinazo izinsiza nemithi ayikho.”
Lokhu kushiwo ngabasebenzi besibhedlela Osindisweni abebebhikisha ngaphandle kwalesi sibhedlela, izolo, bethi sebekhathele ukukhuluma nabaphathi balesi sibhedlela bezama ukuthola izimpendulo bangazitholi, sebefuna ukuthi uMnyango wezeMpilo ungenele kulesi simo.
Unobhala wegatsha leNehawu elikulesi sibhedlela, uNksz Thokozani Zulu uthe abahlengikazi bakulesi sibhedlela bazithola bephoqelekile ukuthi banikeze iziguli i-panado, ngoba yiyona ekhona.
Muva nje uthe kuphele namabhandishi, iziguli ebezizokwelashwa zidedelwe kuyaphoqeleka ukuthi zilaliswe kusalindwe imithi esuke ingekho.
“Kubuhlungu ukutshela isiguli ukuthi asibuyele ekhaya singaphethe lutho. Size sigcine siphoqeleka ukuthi okungenani asisilalise, sisinike amaphilisi ezinhlungu kuze kufike imithi ebolekwe kwezinye izikhungo zezempilo eziseduze,” kusho yena.
Okunye athe kuyinkinga kulesi sibhedlela wukuthi kunezikhala eziningi ezingagcwalisiwe okuholela ekutheni abasebenzi bakulesi sibhedlela bangawenzi kahle umsebenzi wabo.
Iziguli eziphethwe yizifo ezijwayelekile uthe kuyenzeka zilaliswe ewodini eyodwa nezinofuba.
Omunye wabahlengikazi bakulesi sibhedlela ongathandanga ukudalulwa igama lakhe, uthe kuyenzeka abahlengikazi abasewodini leziguli ezingakwazi ukuzisiza babe bane iziguli zibe zingu-60.
“Lezi ziguli kumele zigezwe, zifunzwe, zibuye zinikezwe imithi. Uma kwenzeka kuba nezidlulayo emhlabeni kumele usihambise emakhazeni.
“Kuyenzeka kufike umndeni wesinye isiguli ufike singakagezwa. Umndeni ulwa nawe ungaqondi ukuthi nathi sisebenza ngaphansi kwengcindezi akukhona ukuthi siyenqena ukusebenza,” kusho yena.
Ilunga lomphakathi elingathandanga ukudalulwa lithe kuyenzeka uphindele kuze kube kathathu kudokotela uyomtshela ukuthi imithi akubhalele yona, kuthiwa ayikho ekhemisi.
“Le nto ibuhlungu kakhulu ngoba sifika esibhedlela ngo-5 ekuseni sishudule kulayini, ekugcineni kuthiwe imithi ayikho. Iningi labantu bakule ndawo alisebenzi, lithembele ezikhungweni zezempilo ezingakhokhelwa njengalesi,” kusho yena.
UMnuz Musa Gumede inhloko yoMnyango wezezeMpilo esifundazweni owamukele uhla lwezikhalazo zomphakathi neNehawu, uthe ezinye zezinkinga ezibikwayo kulesi sibhedlela zikhona nakwezinye izibhedlela.
Uthe zadalwa wukuthi ngo-2014 lo mnyango ubungenayo ibhajethi eyenele kwagcina sekuthiwa kuzoqashwa abasebenzi abenza imisebenzi ebucayi.
“Njengamanje sinethimba lomnyango elihamba lingena zonke izikhungo, libheka ukuthi isikhungo ngasinye kudingeka sibe nabasebenzi abangakanani, nginesiqiniseko sokuthi liyeza nakulesi sibhedlela.
“Ngasohlangothini lwemithi nezinye izinsiza sisazohlala phansi nabaphathi sizwe ukuthi yini imbangela, sizame ukuyilungisa, sizobuya sizonazisa ukuthi yini esiyitholile,” kusho yena.