AmaKhomanisi ajahe kudedelwe umbiko weKhomishini kaMoerane
I-SACP ifuna udedelwe ngokushesha umbiko weKhomishini kaMoerane ebiphenya ngokubulawa kwabantu KwaZulu-Natal, ukuze kutholakale ikhambi lokuqeda ukubulana.
Esithangamini nabezindaba eThekwini izolo, uNobhala wesigungu esisha samaKhomanisi esifundeni iTheku, uMnuz Phumlani Mthembu uthe bakhathazekile ngokungaphothulwa kombiko kaMoerane.
“Ukukhishwa ngokushesha kwalo mbiko emphakathini kuzoba neqhaza elibalulekile emkhankasweni wokulwa nesihlava sokubulawa kwabantu esifundazweni ngoba ikhomishini izokwazi ukuveza ukuthi yiziphi izinto ezenza abantu babulalane nokuthi kungagwenywa kanjani,” kusho uMthembu, okhethwe nesigungu sakhe engqungqutheleni ebiseMangosuthu University of Technology ngempelasonto.
IKhomishini kaMoerane bekulindeleke ukuthi ikhiphe umbiko wayo ngasekupheleni kwenyanga uMashi.
UNdunankulu waKwaZuluNatal uMnuz Willies Mchunu ngesikhathi esesithangamini nabezindaba eThekwini ngoMsombuluko, uthe iKhomishini kaMoerane icele ukuthi bayelulele isikhathi ukuze ikwazi ukuqeda ukuhlanganisa umbiko wayo.
“Bacele ukuthi sibanikeze isikhathi kuze kuphele uMeyi khona bezokwazi ukuqoqa yonke into abayitholile bakwazi ukuyifaka embikweni wabo,” kusho uMchunu.
UMchunu wasungula le khomishini ngemuva kokwenyuka kwezinga lokubulawa kwabantu nosopolitiki eKZN.
“Asikhathazekile kuphela ngokubulawa kwabantu KwaZuluNatal futhi sidiniwe ngokuthi isifundazwe sethu sesiphenduke inkundla yokubulawa kosopolitiki,”kusho uMthembu.
Unxuse abangaba nolwazi olungaholela ekubanjweni kwababulali nabathumi babo ukuthi babikele amaphoyisa. USihlalo wamaKhomanisi eThekwini, uMnuz Zakhele Gumede uthe sekucacile ukuthi amaqabane abulalana ngoba ebanga amandla okuphatha izinsiza zikahulumeni.
“Wonke umuntu ufuna ukuba semandleni khona ezokwazi ukudla nalabo asondelene nabo. Ayikho enye into eyenza kubulawane ngaphandle kwaleyo,” kusho uGumede.
Ubuholi bamaKhomanisi buthe abaneme ngendlela uMkhandlu weTheku ophethwe ngayo. Buphakamise ukuthi kube nophenyo ngohlelo lokuqasha abetoho olubizwa nge-EPWP.