Bamincile abashadikazi kushuba kowabo
BABAMBE umoya ukuthi bangene emzuliswaneni wokugcina abesifazane abathathu baseThekwini, abangenele umncintiswano kaTammy Taylor Mrs South Africa (SA).
UDkt Nqobile Sithole (32), uNkk Natisha Makka (40) noNkk Jo-Ann Barnwell (37) bayingxenye yabangu-100 abangenele umncintiswano, ngoJuni 29 okuzohlungwa kubo iTop 25 e-Emperors Palace eGoli. Lezi zintokazi izolo bezihlangene eBallito ukuyoqokelela imfucuza njengoba zisebenzisana neMpact Recycling. Le mfucuza izogaywa kabusha kwenziwe imikhiqizo emisha bese imali ezoqoqwa inikelwe esikhwameni sezintandane. Ukunikela kungeminye yemigomo yomncintiswano ukuze abangenele babe semathubeni okucosha amaphuzu.
UDkt Sithole onendawo yokusebenza Ethekwini Wellness Centre, uthe uyathemba ukuthi uzongena kwiTop 25 ngoba isicoco kumele sibuyele KwaZulu-Natal. UDkt Sithole owaphothula u-matric eBizimali High eNkandla, uthe ubevele enothando lokuthuthukisa umphakathi nokunikela, yingakho engenele uMrs SA.
“Ngakhula emakhaya ngihamba ngezinyawo njengazo zonke izingane. Ngibonile ukuthi imfundo iyishintshe kanjani impilo yami, yingakho ngikhuthaza nabanye ukuthi bafunde. Ngasungula isikhwama somfundaze ukunikelela abafundi abaphasa kahle eBizimali. Ngiyabuyela nasesikoleni ngiyobakhuthaza abafundi,” kuchaza uDkt Sithole.
Unezingane ezintathu. Uthe selokhu engenele umncintiswano nasekhaya bakhuthazekile ngoba uqale phansi wazinaka kakhulu.
UNkk Barnwell uthe bobathathu bahlanganyele ukuqokelela imali ezongena kwiWomen For Women Movement eyingxenye yomncintiswano. Uthe ukholwa ukuthi ngokufukula nokuthuthukisa owesifazane oyedwa, kungabunjwa isizwe esiqinile. Uveze ukuthi ngalo mncintiswano ufuna nokuba yisibonelo ezinganeni zakhe. NgoJuni 1 lezi zintokazi zizoba nomdlalo wegalofu eGoli lapho zizobe ziqhubeka nokuqokelela imali yesikhwama. Ngokwesishiyagalombili nonyaka kusukela kwasungulwa lo mncintiswano ongenelwa ngabesifazane abashadile.
Kulindeleke ukuthi ngasekupheleni konyaka uNkk Nicole Capper waseGauteng, adlulise isicoco kwenye intokazi. Ngaphambi kwakhe isicoco besiphethwe nguNkk Hlengiwe Twala waseNorth West. Isicoco sagcina ukuza KwaZulu-Natal ngo2015 sihlwithwa nguNkk Candice Abrahams owagcina enguMrs World ngo-2016.