Lidedelwe ikhehla ebelisolwa nabathumbe izingane
LIDEDELIWE ikhehla elineminyaka engu70 ebeliboshwe nabane abebesolwa ngokuthumba izingane ezintathu base befuna uR2 million kuyise ukuze bazidedele eMadadeni, eNewcastle.
UMnuz Zamani Ndlovu (32), Thamsanqa Sithebe (25), Sabatha Zulu (22) noSegundo Xulu (24) bavele enkantolo yaseMadadeni izolo icala labo lahlehliselwa uMeyi 29.
Kulindeleke ukuba bathole abameli besihle bese befaka isicelo sebheyili. Abanye abasolwa kuleli cala abaneminyaka engu-18 no-70 badedelwe ngenxa yokungatholakali kobufakazi obubahlanganisa necala.
Abasolwa baboshwe ngoMsombuluko kulandela ukuthunjwa kwamantombazane amathathu, atholwa efihlwe emzini womuntu khona eNewcastle.
Amantombazane aneminyaka engu-11, eyisishiyagalolunye, neneminyaka eyisithupha athunjwa eya esikoleni ehanjiswa nabanye abafundi abangabafana, abathathu.
Abanye abafundi babafana kuthiwa bakwazi ukubaleka ngesikhathi abasolwa bekhomba ngesibhamu owayebahambisa ngemoto. Amantombazane kwahanjwa nawo. Abasolwa kuthiwa bashaya ucingo ngenombolo efihliwe befuna uR2 million kuyise wezingane ukuze bezozidedela.
Amaphoyisa ababopha ngalo ilanga lesigameko.
Laba babhekene necala lokuduna imoto, elokuthumba, elokutholakala nesibhamu esingekho emthethweni, kwengezwa necala lokushushumbisa abantu.
Omunye wabasolwa kuthiwa ungumngani kayise wezingane kanti kuthiwa ubenolwazi lokuthi ubesanda kudayisa enye itekisi yakhe.