I-SACP iyaqhubeka neyokuzimela okhethweni

I-SACP ithi iyaqhubeka nezingxoxo zokuthi izimele okhethweni phezu kokuba obengumengameli wakuleli uMnuz Jacob Zuma engasekho esikhundleni.

Esithangamini nabezindaba eThekwini izolo uNobhala weSACP esifundeni iTheku, uMnuz Phumlani Mthembu uthe izingxoxo zokuthi amaKhomanisi azimele njengenhlangano azincikile ekutheni ngubani umengameli we-ANC.

“Izingxoxo ziyaqhubeka, isinqumo sizophuma uma sekuhlangenwe ezingeni likazwelonke,” kusho uMthembu.

I-SACP kade yaqala ikhuluma ngendaba yokuthi icabanga ukuzimela njengeqembu okhethweni, lenkulumo iqine kakhulu ngesikhathi sikaZuma.

AmaKhomanisi neCosatu bebesola uZuma ngokubashaya indiva okuholele ekutheni bugcine bumuncu ubudlelwano phakathi kwe-ANC namadlelandawonye.

Ukuba muncu kobudlelwano phakathi kwamadlelandawonye kuze kwaholela ekutheni uZuma avalwe ukuba ahambele imibuthano yeSACP neCosatu.

Kodwa uMengameli uMnuz Cyril Ramaphosa usembhidlangweni wokuvuselela ubudlelwano namadlelandawonye.

UMthembu uthe ukuzimela okhethweni kwamaKhomanisi akusho ukuthi bazobe sebephuma ombimbini.

Uthe ubuholi babo ezingeni lukazwelonke buyazama ukuxoxisana ne-ANC ngenhloso yokuvuselela nokuqinisa umbimbi.

Uthe nakuba uKhongolose kuyiwona ohola umbimbi kodwa kubalulekile ukuthi kuxoxiswane uma sekuthathwa izinqumo.

UMthembu uveze ukuthi ababoni kuyisikhathi esikahle ukuba i-ANC KwaZuluNatal iqhubeke nengqungquthela yokukhetha ubuholi obusha kube kusakhona izikhalo ezingakaxazululwa.

“Nathi singamalungu e-ANC ngokugcwele kodwa abaningi bethu abaveli kumqulu wamagama amalungu enhlangano, okuyinto amaqabane amaningi akhala ngayo esifundazweni,” kusho uMthembu.