Uboshwe esemsebenzini ‘owazama ukubulala’ eGlebe

KUBOSHWE omunye umsolwa ehostela lezidubedube eGlebelands eMlaza ngecala lokuzama ukubulala.

Okhulumela amaphoyisa KwaZuluNatal uColonel Thembeka Mbele uthe ngoLwesibili ezintatha amaphoyisa ophiko lweNational Intervention Unit aqaphe isimo kuleli hostela abenomkhankaso wezobunhloli eMaydon Wharf naseBayhead ethungatha umsolwa obefunelwa icala lokudubula eGlebelands.

Uthe umsolwa oneminyaka engu-38 uboshwe eBayhead ngecala lokuzama ukubulala.

Kuthiwa ngo-Agasti 31 nyakenye kuyoshaya u-9 ebusuku, indoda eneminyaka engu-45 yayikuBlock P ehostela ngesikhathi kuqhamuka umsolwa owaziwayo wayidubula.

Kuthiwa umgilwa wadubuleka ekhanda, ehlombe nakwesingezansi.

Umgilwa wakwazi ukubaleka wacela usizo emuva kokudutshulwa. Amaphoyisa ayeseduze amsiza waphuthunyiswa esibhedlela.

UColonel Mbele uthe umsolwa selokhu abaleka ngaleso sikhathi endaweni kwaze kwaba uyaboshwa ngoLwesibili.

Umsolwa kuthiwa uboshwe elapho esebenza khona eBayhead.

Uzovela enkantolo yeMantshi eMlaza kusasa ngecala lokuzama ukubulala.

Kuboshwa lona nje kusanda kugwetshwa omunye umsolwa wakuleli hostela ngecala lokuzama ukubulala elenzeka ehostela.

UBongani Mbhele (38) ugwetshwe ekuqaleni kwenyanga enkantolo yeMantshi eScottburgh ngecala lokuzama ukubulala kanti usabhekene namanye amacala okubulala okuthiwa enzeka kulo leli hostela.