Bafundiswa ngezenhlanzeko
BAFUNDE kabanzi ngenhlanzeko abahlanza izikole zaseMlaza izolo enkundleni yokucobelelana ngolwazi, ebisePort Natal Primary eMbilo, eThekwini. Inkundla yokucobelelana ngolwazi kuhloswe ngayo ukuthi kunyuswe izinga lenhlanzeko ezindlini zangasese zesikole zesifunda Ugu noMlaza nokubaqeqesha ukuthi bawenze kahle lo msebenzi.
Isikhulu esiphezulu sakwaDomestos okuyibo abasungula lolu hlelo uNksz Ant Bishop sithe bebambisene noMnyango weMfundo eyisiSekelo basebenza ngokuzikhandla ukulwa nezinkinga zenhlanzeko kuleli kusuka ngo-2010.
“Sigxile ezinhlelweni ezihambisana nenhlanzeko ehlukene.”
Uthe uhlelo lwabo iThe Cleaner Toilets Brighter Future lusiza ngokuthi kuhlanzeke ezindlini ezincane. Uthe bona abayakhi ingqalasizinda kodwa benza isiqiniseko sokuthi ihlanzekile ngezinhlelo zabo zokufundisa abahlanza ezikoleni nezingane ngenhlanzeko.
Uthe izolo bebeluqala lolu hlelo lokufundisa abahlanza izikole ngenhlanzeko kanti bazoqhubeka nalo esifundeni Ugu naseMlaza.
UNkk Thoko Luthuli wenhlangano iHIV/AIDS Life Skills futhi ophuma esifundeni uMlaza uthe bacelwa ukuthi bathole izikole ezinezindlu ezincane ezishaywayo ezifundeni Ugu noMlaza ukuze baqale lolu hlelo lokuhlanza izikole ezikule ndawo.
“Sijabule kakhulu ngalolu hlelo njengoba luzosiza abafundi basebenzise izindlu zangasese ezihlanzekile. Nabahlanza izikole bakwazi ukuzigcina bona nezindlu zangasese behlanzekile,’’ kusho uNkk Luthuli.
Uthishanhloko waseMzwilili Primary eMlaza, uMnuz Thembalihle Ndimande uthe ubonga akaphezi kwaboMnyango wezeMfundo nabakwaDomestos ngalolu hlelo oluzoqinisekisa ukuthi abafundi bahlanzekile ukuze bangaphazamiseki ezifundweni zabo ngenxa yezifo.
“Lolu hlelo luzozuzisa zonke izikole zalezi zifunda nabahlanza izikole nabafundi,” kusho uNdimande.
Izikole zihlinzeka izikole ngama-gloves, izinto zokugqoka nokokuvala amakhala ukuze bangangenwa ngamagciwane.
UNksz Sibongile Khanyile ohlanza eMthethweni Higher Primary, eMlaza ulibonge kakhulu lolu hlelo. Uthe luzokwenza impilo yabo ibe lula futhi lugcine bona nesikole behlanzekile.
‘’Uthishanhloko neDomestos basisize kakhulu ngalolu hlelo njengoba izinto zokuhlanza izindlu zangasese zisisiza,” kusho uNksz Khanyile.