I-Urban Futures Centre nosizo kwimilutha

KUFUFUSA ithemba lokuthi intsha nabasebenzisa izidakamizwa abehlulwa ukubekezelela ukuqaleka bangasizakala ngomshanguzo ocwaningwayo.

Isikhungo i-Urban Futures Centre esiseDurban University of Technology ngokubambisana nabeTB HIV Care, siqale ucwaningo olubheka ukuthi ukusetshenziswa kweMethadone kubantu abasebenzisa i-heroin, okwaziwa nge-Opiod Sustitution Theraphy (OSP), kungasiza ekutheni imilutha iphume kulesi sidakamizwa.

Usonhlalakahle weTB HIV Care, uMnuz Klaas Mtshweni uthe bangu50 abasebenzisa lesi sidakamizwa eThekwini abayingxenye yalolu cwaningo olwenziwa yi-Urban Future Centre.

“Sesitholile ukuthi into eyenza ukuthi abasebenzisa izidakamizwa bangaluqedi uhlelo lokubasiza baziyeke izinhlungu abathi baba nazo uma bengazisebenzisanga okubizwa nge-arosta. Lezi zinhlungu ngokuthola kwethu zidala ukuthi umuntu ashaye ungqimphothwe, abuyele ezidakamizweni.”

USolwazi Monique Marks, uthe lolu cwaningo oluzothatha izinyanga ezingu-18 luqale nyakenye wathi kulindeleke ukuthi luphele ngo-Okthoba nonyaka.

“Uma imiphumela yalo ikhombisa ukuthi kuba lula ukuyeka izidakamizwa uma ungaphathwa yi-arosta, sizokwenza isiphakamiso sokuthi iMethadone isetshenziswe njengeminye yemithi yokwelapha ukulangazelela izidakamizwa,” kusho uMarks.

UMtshweni uthe njengamanje iMethadone ayisetshenziswa ezibhedlela noma ezikhungweni zezempilo zikahulumeni, kwezizimele iyasetsheziswa kodwa isetshenziselwa ukuhlanza umzimba okujwayele ukuthi kube yizinsuku ezintathu.

“Kulolu cwaningo abanenkinga yezidakamizwa sizobanikeza izinyanga eziwu-18,” kusho uMarks.