Kushushwa izitshudeni ukuthi zisayine neNBA
ZIZOZITHOLA zingenalo uxhaso izitshudeni okuzophela uJulayi zingasayinile isivumelwano sokuxhaswa nesikhwama esizisiza ngezimali zokufunda ezikhungweni zemfundo ephakeme, iNational Student Financial Aid Scheme (NSFAS).
Kulo nyaka izitshudeni abazali bazo abahola kusuka kuR350 000 kuya phansi ngonyaka okuwumholo ohlanganisiwe, zizofunda mahhala uma zenza unyaka wokuqala. Lokho kulandela isimemezelo sowayengumengameli wezwe uMnuz Jacob Zuma esithi kuzoba nemfundo yamahhala kulezi zitshudeni.
Izitshudeni kudingeka ziyosayina amafomu aziwa ngeNational Student Financial Aid Scheme Bursary Agreement (NBA).
Okhulumela isikhwama, uMnuz Kagisho Mamabolo, uthe okumele bazosayina kwiNBA ngabenza unyaka wokuqala nabafake izicelo zoxhaso okokuqala.
Uthe kuthunyelwa i-email enezinto izitshudeni okudingeka zizenze bese zisayina, isitshudeni ngasinye sizoyithola leyo email.
Uthe iNBA inemibandela emisha okumele izitshudeni ziyilandele, njengokuthi kumele zigxile ezifundweni ziziphathe ngendlela, kumele zilandele imigomo yezifundo njengokuya emakilasini ziyofunda, ziqede imisebenzi ezijutshwe ukuyenza, zibhale zonke izivivinyo.
Kumele ziphase ngo-50% zonke izifundo zazo onyakeni wokuqala, eziyohlala kwamanye amazwe kumele zikhokhe yonke imali ezixhaswe ngayo ngaphambi kokuba zihambe.
“Ngonyaka wesibili izitshudeni kumele zisize emphakathini izinsuku ezingu-10 noma amahora angu-80 ngonyaka. Uma izitshudeni zihluleka ukulandela le migomo zingaphucwa umfundaze.”
Unxuse izikhungo ukuthi zisize izitshudeni zisayine izivumelwano ungakashayi umnqamulajuqu. Kwabashintsha izinombolo zocingo kudingeka bathumele i-email nekhophi kamazisi nencwadi efungelwe eshoyo ukuthi ushintshe inombolo nokuthi ithini entsha.
Bangathumela ku: uds@nsfas.org.za noma bashayele kwaNSFAS ku: 0860 067 327 noma ku: 021 763 3200.