Sikhulisa izidlova ezingenamqondo
ASIKHO futhi asisoze saba khona isimo esivumela umuntu wesilisa ukuthi ashaye umuntu wesifazane!
Abantu besilisa badinga ukufaka lokhu ezingqondweni zabo. Mhlawumbe njalo ekuseni umuntu wesilisa akavuke, azibuke esibukweni bese esho lawa mazwi: “Asikho isizathu esinganginika igunya lokuthi ngishaye umuntu wesifazane.” Ngikholwa wukuthi uma bengasho lawa mazwi abantu besilisa kaningi ngokwanele, bogcina bekukholwa. Kungabukeka kuyisenzo esincane kodwa kuyisenzo esinamandla, isenzo esijwayele ukusenza singabantu besifazane ukuzikhuthaza uma sibhekene nezinkinga. Sekwanele madoda! Sekwanele!
Asiqale sibuke nje into encane enganakekile abantu besifazane ababhekana nayo mihla namalanga; uma umfana ekumisa, efuna ukukushela, wangama, ukuthuka ngenkulu inhlamba! Kudalwa yini lokhu?
Bathukuthele abantu besilisa, asazi bathukutheliswe yini futhi singabantu besifazane asazi ukuthi isixazululo sale nkinga yisiphi kodwa kuyacaca ukuthi kuningi okwenzeka ezinhliziyweni zabantu besilisa, abangakhulumi ngako.
Inhliziyo yami ibuhlungu ngabantu besifazane ababulawayo, bebulawa ngabantu okumele ngabe bayabanakekela futhi bayabathanda.
Awaphumele obala amadoda asho ukuthi ikuphi inkinga, singasiza kanjani ngoba sizimisele ukusiza kodwa ngeke sikwazi ukusiza uma amadoda engasho ukuthi ikuphi inkinga yawo.
Mina ngihlezi ngigqugquzela abantu besifazane ukuthi abazithande, bafunde, baqale amabhizinisi ukuze bazimele. Kodwa manje sengibona sengathi kumele sime kancane, ngoba kubukeka sengathi sikhulisa isizwe sabantu besifazane abanamandla ngokweqile ngokomqondo, sibakhulisela amadoda angakhulile ngokomqondo futhi ayizidlova.
Ake kusukume amadoda aqotho, afundise abafana abasebancane ukuthi buyini ubudoda, kusho ukuthini ukuthi “indoda yinhloko yekhaya”.
Kubantu besifazane ake sidlalele kude nabesilisa esibabonayo ukuthi banobudlova.
Yebo, ngeke umbonen owesilisa esakushela ukuthi unobulwane obukhona kodwa ake sizifundise ukuthi uma umuntu wesilisa eke wenza into eyodwa ongayithandi, mshiye, ungabekezeli.
Ake siyeke ukwenza umthwalo wethu ukukhulisa amadoda esithandana nawo. Indoda, iyathanda, iyanakekela, iyavikela njalo, akushintshi noma isidiniwe, akushintshi.
UNKK Masechaba Mthembu, uyimenenja yezokukhangisa nokuqoqwa kwezimali enkampanini iBlack Umbrellas