‘I-BP iyingozi ingabulala imithambo yegazi’
ININGI labantu bakuleli kabazazi ukuthi banaso noma abanaso isifo sokwehla nokwenyuka komfutho wegazi, iBlood Pressure (BP) ngoba abakaze bazihlolele lesi sifo kanti lesi sifo asinazo izimpawu ezinkulu ezibonakalayo uma sisanda kukungena.
UDkt Gugulethu Magubane wesibhedlela iKrugersdorp Netcare, uthe balinganiselwa ku-40% wabantu bakuleli okuthiwa banalesi sifo esibuye saziwe nge-hypertension kodwa uhhafu wabo awazi ukuthi unalesi sifo.
“Uma singalawulwa ngemithi ethize lesi sifo singaba nobungozi obungaholela ekulimaleni kwemithambo yegazi nezitho ezithile zomzimba,” kuxwayisa uDkt Magubane.
Uthe izifo ezingadalwa wukungelashwa noma wukungalawulwa komfutho wegazi, yisifo senhliziyo, ukungasebenzi ngendlela kwezinso nesifo sohlangothi.
Uqhube wathi u80% weziguli ezifika kulesi sibhedlela azazi nokuthi kumele ngabe izinga lomfutho wegazi wazo ukusiphi isigaba ngokwezinombolo, nokuthi ngokujwayelekile uma behlolwa ezabo izinombolo ziye zithini.
UDkt Magubane ubeyingxenye yabantu abazinikele ukuqwashisa ngalesi sifo njengoba le nyanga ithathwa njengeyokuqwashisa ngalesi sifo ngokwekhalenda lezempilo, kukhuthazwa kakhulu ukuthi bonke abantu bazi ukuthi uma behlolwa zithini izinombolo ezivezwa umshini okala izinga leBP egazini. Lokhu kuhambisana nomkhankaso wokubala ukuthi bangaki abantu abaphethwe yilesi sifo, iMay Measurement Month (MMM) owenziwa emhlabeni jikelele. Ngokwezibalo zakamuva zeMMM, bangu-10 million abantu ababulawa yiBP ngonyaka emhlabeni. “Ngeshwa abantu bakithi abazi ukuthi banalesi sifo ngenhlanhla, isikhathi esiningi bathola ngenxa yokuthi bahlolwe kunomkhankaso othile noma sebegula udokotela noma umhlengikazi wase ehlola nokuthi lingakanani izinga leBP.”
Ngakolunye uhlangothi uSolwazi Brian Rayner oyinhloko yophiko olwenza ucwaningo ngesifo seBP nesifo sezinso esibhedlela eGroot Schuur nase-University of Cape Town, uthe ngokomthetho kumele bonke abantu basihlolele lesi sifo njalo ngonyaka, ukuze kunciphe amathuba okuhlaselwa yisifo senhliziyo, esohlangothi nesezinso.
Umbiko we-International Society of Hypertension ukhombisa ukuthi bangu6.2 million abantu bakuleli abaneBP engaphezulu kuka140/80, abangu-3.2 million baneBP engaphezulu kuka160/95, okuyizinga eliphezulu ngokweqile.
Kulinganiselwa ekutheni ngosuku kufa amadoda angu-53 nabesifazane abangu-78 bebulawa yizifo ezisondelene nalesi sifo.