Inselelo kuhulumeni ngamathaveni angojombigazi
SEKUKANINGI imibiko esiba nayo iveza ukungaphephi emathaveni asemalokishini. Kungena abantu bavulele ngenhlamvu babambe inkunzi kokunye kuxabane abebephuza khona badubulane noma bagwazane.
Kulezi zigameko kuphuma izidumbu, kuyenzeka futhi kube khona nabathelwa amachaphazelo.
Isiga sakamuva esibike ngaso ngesethaveni yakwaJ eMlaza, iFreedom Space, esiphenduke ujombigazi njengoba namaphoyisa ethi njalo ngempelasonto ayabizwa sekusuke uthuthuva kudutshulwana noma kugwazwana.
Kucacile ukuthi idinga ukusukunyelwa indaba yokusebenza kwamathaveni emalokishini njengoba kukhona eziduma kuwo kuze kuse kodwa ezokuphepha zingekho noma zingaqinisiwe.
Njengawo wonke amabhizinisi, namathaveni anomthetho owalawulayo.
Ohamba phambili ngothi ithaveni kumele ibe nelayisensi okuzohlaluka kuyo ukusebenza kwayo, ikakhulukazi isikhathi sokuvula nesokuvala.
Embikweni wokubulawa komuntu eMlaza kuvele ukuthi iFreedom Space kayikho ohlwini lwamathaveni anamalayisensi aqondile.
Kulula-ke ukuthi kwenzeke ubuxhwanguxhwangu ethaveni engabhalisiwe ngokusemthethweni ngoba akukho okuyilawulayo.
UMnyango wezokuThuthukiswa koMnotho kumele uqinise umthetho nesijeziso samathaveni angenamalayisensi uphinde ubhekisise indaba yezokuphepha emathaveni.
Amathaveni emalokishini zingezinye zezinto eziguqula isimo somnotho empilweni yabantu, yingakho uhulumeni kumele ubalekelele nabanikazi bawo ukuthi nawo asebenze njengebhizinisi elihlelekile elizokwazi nokudonsa amakhasimende akwezinye izindawo.
Izindawo ezinjengeMax’s Lifestyle, Eyadini Lounge neNUZ Vegas Lounge ezikuleli lokishi kazivelanga nje zaba kuleli zinga.
Nazo zaqala kancane zingamathaveni kepha manje zisezingeni eliphezulu.
Siphonsela inselelo uhulumeni ukuthi ulekelele ukuthuthukisa abanikazi bamathaveni ebese uqinisa umthetho wokusebenza kwawo.
Kumele kuphele ukuduma kwawo ngokuba yikwajombigazi kepha kube yindawo abantu abazozithokozisa kuyo bekhululekile bengenalo itwetwe lokuthi bangase benzakaliswe.