Ohlele ukubulala yini engagwetshwa intambo?
MHLELI; Ngithi ake ngisike elijikayo ngokusebenza komthetho kuleli. Nobaba uMandela waze washona engaphumeli obala ngesigwebo sentambo. Kuthiwa lesi sigwebo asihambisani nesikhathi.
Nakhu okufanele sikubheke njengezwe.
Bangaki abantu abafa bengenacala maqede ababulali bathole ushwele?
Kuthatha isikhathi esingakanani ukuqoqa ubufakazi obuphelele?
Ezobunhloli, abaseshi nabashushisi baqeqesheke ngokwanele nje?
Amandla anikezwe ezokuphepha kwezwe enele yini? Lokhu kuhlanganisa ukuseshwa komuntu ngaphandle kwemibandela.
Izigameko eziningi zikubeka kucace ukuthi umuntu umane athathe isibhamu ayodubula abantu kuthiwe abukho ubufakazi. Noma bukhona ngeke agwetshwa intambo.
Abahlasela izimoto zemali basuke behlelile.
Ababulala osomatekisi, osopolitiki nabanye abathengwayo basuke behlelile. Pho bukuphi ubuqaba nobudlova uma kugwetshwa umuntu onjalo?
Umuntu ophula umthetho womgwaqo bese kufa abantu usuke azi ukuthi kuzofa abantu. Pho likuphi iphutha lapho?
Umuntu owehla enyuka nesibhamu sokwebiwa usithathephi futhi usisaphi? Nalokho kuyiphutha?
Mina ngibona kufanele isigwebo singasheshi sikhishwe kodwa sicutshungulwe ngokwanele ze simfanele ogwetshwayo. Umuntu ohlelile ukulimaza nokubulala kungani engagwetshwa intambo? Zingakanani izimali zesizwe ezimoshwa ngala macala zondla abenzi bokubi bekwenza ngenhloso? Uhulumeni akacabange abuyisele lolu daba kubantu. Ngangabantu EMLAZA