Umlando kocijwa ngohlelo lwe-ATP
UZIMISELE ukuyimela kahle i-University of Zululand (Unizulu), owesifazane ongowokuqala omnyama ukuqeqeshwa yinhlangano yamaChartered Accountant kusukela le nyuvesi ingene ngaphansi kohlelo lokuqeqesha kwaSouth African Institute of Chartered Accountants (Saica).
UNksz Getrude Khanyile (24), waseMpumalanga, ubenza izifundo zeB Com Accounting e-Unizulu, ngaphambi kokwenza iHonours e-University of Johannesburg. Wunyaka wesithathu lona eqale ukuqeqeshwa kwaSaica manje uqedela izifundo zokuba yi-Accountant e-University of Limpopo.
Uhlelo lokuqeqesha abafundela ukuba ama-Accountant olubizwa nge-Academic Traineeship Programme (ATP) luhlose ukuthuthukisa abakulo mkhakha nokuheha abanye. I-Unizulu (Ongoye) igunyazwe ngokusemthethweni ngenyanga edlule ukungena ngaphansi kwalolu hlelo. Lolu hlelo lakwaSaica luhlose nokubhekela izikhungo ebezincishwe amathuba phambilini.
UNksz Khanyile uthe ubengazi ukuthi uqophe umlando ngokungena kulolu hlelo uzwe ngoba esetshelwa Ongoye. “Yize ngisaqeqeshwa kwaSaica kodwa kuyangijabulisa ukuthi ngibe ngowokuqala ngaphansi kwalolu hlelo kwabaphuma Ongoye. Kumele ngiqeqeshwe iminyaka eyisikhombisa ngaphambi kokuthi ngibe yi-Accountant ngokugcwele. Nginalo ithemba ngoba ngisebenza ngokuzimisela futhi kuningi esengiphumelele kukho. Ngizokwenza konke okusemandleni ukuthi ngiyimele kahle inyuvesi.”
Uthe kuyamjabulisa ukuthi bayanda abesifazane abafundela ukuba ngama-Accountant nasebephothulile. Nokho uthe kuyamkhathaza ukuthi bambalwa abasezikhundleni eziphezulu ezinkampanini ezinkulu. “Kwesinye isikhathi nathi siyahluleka ukuziveza singabesifazane yingakho benganele nabasezikhundleni. Sidinga ukuthi laba asebefunde baqeda baziveze kulabo abasafunda ukuze babachushise. Kudingeka asebefundile bavolontiye basize abanye.”
Ugcizelele ukuthi ukhule evele eziphuzela ezifundweni kodwa kwadingeka azikhandle. Uyavuma ukuthi mningi umsebenzi kulo mkhakha yingakho abanye benqena ukufundela ukuba amaAccountant.
UNksz Khanyile waphothula u-matric eNkomazi High eMpumalanga. Uke waqeqeshwa nakwaKPMG.
OyiSenior Executive Transformation and Growth kwaSaica, uNksz Gugu Makhanya, uthe bekuqala ngonyaka odlule ukuthi uhhafu wezitshudeni ezingaphansi kohlelo lwe-ATP kube ngezabamnyama.