Asetholakala ezitolo amaqakelo awashwayo
UKUTHOLA ukuthi angu-7 million amantombazane alova esikoleni uma esesikhathini eNingizimu Afrika kwenze uNkk Sue Barnes wasungula inkampani yamaqakelo awashwayo abizwa ngamaSubz Washable Pads.
Isolezwe labhala ngoNkk Barnes ngo-2013 ngesikhathi esanda kunikela ngamaqakelo ezikoleni ukuze avimbe ukulova kwamantombazane.
Ngaleso sikhathi amaqakelo awashwayo ayengatholakali ezitolo kodwa ayegcina ngokutholakala kuNkk Barnes nakwezinye izinhlangano ezinikela ngawo. UNksz Nokwazi Thabethe okhulumela abakwaSubz Washable Pads uthe amaqakelo abo aseyatholakala kwaClicks eNingizimu Afrika ngoba abantu bazwakalisa ukuthi bayawadinga. “UNkk Barnes waqala leli bhizinisi ngoba efuna ukusiza amantombazane angenayo imali yokuthenga amaqakelo nyangazonke. Kubalulekile ukuwathenga ngoba ahlala iminyaka emithathu futhi ehlisa nezinga lokulova ezikoleni,” kusho uNksz Thabethe.
Uthe ucwaningo luveza ukuthi umuntu wesifazane udinga amaqakelo angu-12 000 kuya kwangu-16 000 empilweni yakhe kodwa uma esebenzisa awashwayo lesi sibalo singehla kakhulu.
“Amaqakelo akwaSubz abiza uR29.95 ezitolo zakwaClicks kanti kusuke kuneqakelo elilodwa. Umuntu udinga amaqakelo ayisithupha abiza uR180. Ahlala iminyaka emihlanu okusho ukuthi umuntu wonga uR1 980 ngoba amaqakelo angawashwa abiza oR40,” kusho uNksz Thabethe.
Uthe abesifazane abasebenzisa amaqakelo awashwayo bazophepha nasemdlavuzeni wesibeletho ngoba awanayo i-gel enamakhemikhali okusolakala ukuthi adala umdlavuza wesibeletho ngokuhamba kwesikhathi.
Uveze ukuthi akunyanyisi ukuwasha amaqakelo ngoba uwawasha njengoba usuke uwasha impahla bese uyawaneka ome.
Ebuzwa ukuthi abesifazane abopha kakhulu ngabe abalungele yini la maqakelo uthe alungele wonke umuntu futhi aphasiswe yiSouth African Bureau of Standards (SABS) okusho ukuthi asezingeni elifanele.
Amanye amaqakelo akwaSubz ahambisana namaphenti akhona kanti amanye ahamba ngawodwana.
Eminye imininingwane ngala maqakelo itholakala ku-www. subzpadz.co.za