Kumangale abaningi esethi khumu
AMA-PROTEAS avuma inselelo yokuvala isikhala sesihlabani u-AB de Villiers omemezele ukuthi usethatha umhlalaphansi ekudlaleleni iqembu lesizwe lekhilikithi.
UDe Villiers umangaze izinkumbi zabathandi bekhilikithi izolo emini ememezela ukuthi useyayeka ukudlalela amaProteas. Le ngwazi yomdlali (34) idlale imidlalo ewu-228 yosuku olulodwa, ewu-114 yeTest newu-78 yeT20.
Inhloko yethimba labaqoki kumaProteas, uLinda Zondi, usale edumele ngesinqumo sikaDe Villiers.
“Sigqemeke engeqiwa ntwala. Ubengene wagamanxa ezinhlelweni zethu zeNdebe yoMhlaba ka-2019. Amagalelo akhe abonakele ngesikhathi sibhekene ne-India ne-Australia. Simangele kakhulu ngalezi zindaba. Ngizamile ukuxoxa naye u-AB ngokuthi ayikho yini indlela esingenza ngayo ukuthi ashintshe isinqumo sakhe okungenani adlale imidlalo yosuku olulodwa kodwa wathi usesithathile isinqumo, ngeke esashintsha,” kusho uZondi.
AmaProteas alungiselela iNdebe yoMhlaba engonyaka ozayo e-England.
“Sidumele ngalesi sinqumo kodwa siyasihlonipha. Ngeke kube lula ukuvala indawo yakhe. Nokho ukuhamba kwakhe kuzovulela omunye ithuba lokuzibonakalisa. Ufana noJacques Kallis. Ngeke uvele usivale kalula isikhala sakhe. Okumqoka wukuthi samukele bese siqhubeka nempilo. Isikhathi sisekhona ngoba sinemidlalo ewu15 yosuku olulodwa ngaphambi kokuthi kuqale iNdebe yoMhlaba. Kunzima ukuvala indawo yomdlali ofana naye. Abadlali bakhona kodwa akumele bacindezwe ukuze bavale isikhala sika-AB,” kusho uZondi.
UDe Villiers ushaye ama-run awu-8 765 emidlalweni engu-114 yamaTest kwathi kweyosuku olulodwa washaya ama-run awu-9 577 emidlalweni engu-228.
Ekhasini lakhe lika-twitter uthe uthathe isinqumo ngenxa yokukhathala.
“Ngifuna ukunazisa ukuthi sengithathe isinqumo sokuyeka ukudlala ikhilikithi ezingeni lomhlaba kwelesizwe. Ngikhathele, ngibone ukuthi kungcono ngiyeke ngisadlala kahle. Sekuyisikhathi sokuthi abanye bazibonakalise. Akusona isinqumo okube lula ukuthi ngisithathe. Bengingeke ngikwazi ukuthi ngizibeke esimeni lapho ngikhetha ukuthi yiluphi uhlobo lwekhilikithi engifuna ukudlala kulo. Angiyeki ngoba ngifuna ukuyokwenza imali. Angiyeki ukuze ngidlale phesheya. Ngizodlala kwiTitans emidlalweni yasekhaya. Okungapheli kuyahlola. Uhambo lwami selufike emaphethelweni,” kusho uDe Villiers.
UDe Villiers udlale kwiNdebe yoMhlaba yosuku olulodwa kathathu nakasikhombisa kweyeT20. Uqale ukudlala kwelesizwe ngo-2004. Uke waba ngukaputeni wamaProteas emidlalweni yosuku olulodwa, eyamaTest neyeT20.
Amagama aphelele: Abraham Benjamin de Villiers
Usuku lokuzalwa nendawo: NgoFebhuwari 17, 1984, ePitoli. Iminyaka: 34 Amaqembu anonhlonze adlale kuwona: South Africa, Africa XI, Barbados Tridents, Delhi Daredevils, Northerns, Royal Challengers Bangalore neTitans.
Izindawo adlala kuzona: IWicketkeeper nebatsman
Isitayela sokudlala: Ubhetha ngesokudla
Indlela yokushwiba: Ushwiba ngesokudla