Uzithele empini efika esitebeleni uKomanisi
UZANYELWE impi efika esitebeleni esisha owayengumpetha we-International Boxing Organisation (Featherweight), uLusanda “Mexican” Komanisi, oqoke ukuphindela e-East London nyakenye ngenxa yendlala yezimpi eGauteng.
UKomanisi usejoyine iGolden Gloves Promotions kaRodney Berman eqhatha inqwaba yabashayisibhakela abaphezulu eNingizimu Afrika. Uthathe isinqumo sokushintsha isisindo, wenyukela kwi-lightweight eshaya ngamabhokisa ahlonishwayo kuleli okukhona kuwona abakhaya bakhe uXolisani “Nomeva” Ndongeni, obengumpetha webhande le-IBO no-Azinga “Golden Boy” Fuzile. Ezinyangeni ezedlule, esigabeni se-lightweight kungene owayengumpetha we-IBO ne-World Boxing Association (WBA) featherweight, uSimpiwe “V12” Vetyeka ofike wawina ibhande le-World Boxing Organisation (WBO) Africa Lightweight empini yakhe yokuqala. UKomanisi bekuhlelwe ukuthi uzobingelela kwiGolden Gloves ngempi yebhande le-SA lightweight nompetha uThompson Mokwana kodwa kwabuye kwahoxiswa lokho. Ugcine ukungena eringini ngoSepthemba nyakenye ehlulwa ngomngqimuzo womlalisa phansi ngomzuliswano wesibili nguJhack Tepora wasePhilippines empini yebhande le-WBO InterContinental featherweight phambi kwabalandeli bakhe e-East London. Uhlelelwe ukuthi abuyele eringini ngoSepthemba 1 noMichael Mokoena empini okungase kubangwe kuyona ibhande le-African Boxing Union (ABU).
“Bengibheke ukuthi ngiqale kahle esisindweni esisha ngemizuliswano emincane, nginyukele ezintweni ezinkulu. Kodwa ke uBerman unezinhlelo zakhe. Angifuni ukuyena isibhakela ngingenalutho, ngifuna ukuziqophela owami umlando. Ngifuna ukufana noZolani Tete, Budler (Hekkie) noSimphiwe Vetyeka abangompetha abahlonishwayo,” kusho uKomanisi.
Mayelana nokujoyina iGolden Gloves uthe: “Benginobuhlobo noBerman. Bengimkweleta kakhulu emuva kokuthi ngaphuma kwi-super 4 featherweight. Ngikhulume nomqeqeshi wami nemenenja, sabuyela kuyena.”
UBerman uhambela phezulu kulezi zinsuku kulandela ukuwina amabhande amathathu kukaBudler phesheya kwezilwandle. UBudler ubuye egaxe ibhande le-International Boxing Federation (IBF), WBA super nele-The Ring Magazine.
“Lesi kuzoba yisivivinyo esihle kuKomanisi. UMokoena uyi-lightweight yokuzalwa enodalimede bezibhakela. Uma uKomanisi engadlula kuyena, uzoba nekusasa eliqhakazile kulesi sigaba,” kusho uBerman.